Манай улс шатахууны нөөцөө 2,3 сараар бүрдүүлэх арга хэмжээ авч эхэллээ

Шатахууны нийлүүлэлтээс хамаарсан үнийн огцом өсөлт, шатахууны хомсдол үүсэх үед зарим чухал /нийтийн тээвэр, төрийн үйлчилгээ зэрэг/ салбарын хэрэгцээг 15 хоног хангах зорилгоор автобензины улсын нөөц бүрдүүлэхэд шаардагдах 5 тэрбум төгрөгийг Эрсдлийн сангаас гаргах болов.

Одоогоор газрын тосны бүтээгдэхүүний нөөц хангалттай, ойрын үед хангамж тогтвортой байгаа тухай Эрдэс баялаг, эрчим хүчний яамнаас Засгийн газрын хуралдаанд мэдээллээ. Цаашид онцгой байдлын нөөц дээр нэмж тогтмол 2,3 сарын нөөцтэй болох үүднээс Засгийн газраас дээрх арга хэмжээг авч байгаа юм байна.

Төрийн чухал үйлчилгээний хэрэгцээг хангах, газрын тосны бүтээгдэхүүний үнийн огцом өсөлтийг саармагжуулах зорилгоор 2008 онд УИХ тогтоол гарган улсын нөөцийн доод хэмжээг 2 сарын хэрэглээний буюу 120 мянган тоннд хүргэж нэмэгдүүлэхийг Засгийн газарт даалгасан. Энэ дагуу “Монгол Улсыг хөгжүүлэх сан”-гийн хөрөнгөөр 28,3 мянган тонн бензин, дизель түлшний нөөц бүрдүүлснээс 4 мянган тонн түлшийг 2009 оны ургац хураалтад ашиглаж, үлдсэнийг нь өнгөрсөн оны 8, 9 дүгээр сард дотоодын зах зээлд хомсдол үүсэх нөхцөл бүрдсэн учир борлуулж, мөнгийг нь төсөвт төвлөрүүлжээ.

Өнгөрсөн сард дизель түлшний хилийн үнэ 95 мянган төгрөгөөр нэмэгдсэн учир Засгийн газар шийдвэр гарган Сүхбаатар, Замын-Үүд, Эрээнцав, Алтанбулаг боомтоор оруулж ирэх түлшний тонн тутамд 100 мянган төгрөгийн онцгой албан татвар ногдуулж байсныг тэглэсэн. Засгийн газар ийнхүү тухай бүр нь бензин, дизель түлшний хилийн үнэ өсөхөд татварыг бууруулж, хилийн үнэ буурахад татварыг нэмж байснаар дотоодын зах зээл дэх жижиглэн худалдааны үнийн огцом өсөлтийг сааруулж, тогтвортой байлгаж байна.