Чанаргүй зам тавьсан компаниудыг торгоод өнгөрлөө

Улсын төсөв, гадаадын зээл тусламжаар 11 аймагт тавьж байгаа авто зам, замын байгууламж,

 онгоц хөөрч буух зурвасын зураг төсөл, барилга угсралтын ажлыг МХЕГ-аас шалгажээ. Хөвсгөл аймгийн Мөрөн сумын нисэх онгоцны буудлын хөөрч буух зурвасын геодизийн хэмжилт буруу, зогсоолын талбай төлөвлөөгүй, ГовьАлтай, Өвөрхангай айм гийн нутагт тавьсан 23 км авто замын хуучин хучилтыг хуулалгүйгээр өнгөн хэсгийг нь давхарлах аргаар нүд хуурсан зөрчлийг уг шалгалтаар илрүүлсэн байна.

Мөн Хар хорин, Хужирт чиглэлийн 16 км замд гүүр байгуулахдаа буруу төлөвлөчихөж. Үүний уршгаар “Хужирт” рашаан сувилал хур элбэгтэй үед үерт автах нөхцөл бүрджээ. Авто зам, замын байгууламжийн барилга угсралтын гүйцэтгэгч компаниудын инженер техникийн ажилчид цөөн, ажлын хариуцлага сул, тоног төхөөрөмж хангалтгүй зэрэг нь зөрчил гаргах үндэс болдог байна.

МХЕГ-ын Зам тээвэр, мэдээлэл холбоо хариуцсан улсын ахлах байцаагч Д.Доржханд “Сүүлийн үед ашиглалтад оруулж байгаа ихэнх замыг чанаргүй барьж байгаа нь анхаарал татлаа. Их хэмжээний мөнгөөр зам тавьдаг ч тэр нь эргээд түүнээс илүү хохирол учруулахаар байна. Гэтэл бид Захиргааны хариуцлагын тухай хуулийн дагуу 12 аж ахуйн нэгжийг 950 мянган төгрөгөөр торгоод өнгөрлөө гэж ярив.

О.НАМЧИН

mongolnews