Гэрэлт хотын залуус шинэ оноо угтлаа

Нийслэл хэмээх их айлын нэгэн гишүүн болсон Нийслэлийн Нийгмийн Ардчилал Монголын Залуучуудын холбооны шинэ жилийн цэнгүүн “Гэрэлт хотын залуус” нэрийн дор 2 дахь жилдээ амжилттай зохион байгуулагдлаа.

Их хотынхоо 9 эрдэнэ болсон 9 дүүргээ төлөөлөн ирсэн шилдэг залуус нэгэн үдшийг инээд хөөр, баяр баясалаар дүүргэж, өнгөрөгч онд хийж бүтээснээ хүүрнэн ярилцаж, ирээдүйд хийх зүйлээ төлөвлөн санал бодлоо хуваалцаж өнгөрүүлжээ. Залуус байгаа газар инээд наргиан, гэрэл гэгээ, ариун сайхан бүхэн дүүрэн бялхаж байдаг билээ. Гэхдээ их хотын залуус маань энэ үдшийг зөвхөн бие биендээ инээд баясал бэлэглэхэд зориулсангүй ээ. Нийслэл хотдоо өнгө нэмэх гэрэлтүүлэг чимэглэлийн шинэ загвар гарган их хотынхоо хөгжил дэвшилд оюуны хөрөнгө оруулалт хийснээрээ онцлог байв.

Мөн энэ жилийн нэг онцлог нь “Бүтээлч Монгол Залуу, “Хариуцлагатай Монгол Залуу”, “Эрүүл Монгол Залуу”, “Эх оронч Монгол Залуу”, “Боловсролтой Монгол Залуу” гэсэн 5 номинациар шилдэг залуучуудыг шалгаруулан шагнаж урамшуулсан явдал юм.

  “Бүтээлч Монгол Залуу”-аар шинэ технологи туршиж үйлдвэрлэх, технологиудыг бойжуулан, үр ашиг, ач холбогдлыг тодорхойлж зэх зээлд бүтээгдэхүүн хэлбэрээр гаргах ажилд идэвхи чармайлт гарган ажиллаж байгаа Физикийн шинжлэх ухааны докторант, Шинжлэх Ухааны Академийн Инкубатор төвийн захирал Чүлтэмийн Батсүх, “Эрүүл Монгол Залуу”-аар  Дэлхийн топ 5 марафоны нэг болох Лондонгийн марафонд 9-р байр эзэлж 2012 оны Английн олимпод оролцох эрхээ авсан Марафон гүйлтийн Олон улсын хэмжээний мастер Бат-Очирийн Сэр-Од, “Боловсролтой Монгол Залуу”-аар 2011 оны 12 сард зохион байгуулагдсан “Ой тогтоолт”-ын дэлхийн аварга шалгаруулах тэмцээнд амжилттай оролцож 7-р байр, багийн дүнгээр 3-р байр эзэлсэн Монголын Оюун Ухааны Академийн Захирал, Ой тогтоолтын Олон Улсын Мастер Хандсүрэнгийн Хатанбаатар, “Эх оронч Монгол Залуу”-аар 63 хүний алтан амийг аварсан Чингэлтэй дүүргийн аврах, гал унтраах 10-р ангийн гал сөнөөгч, дээд түрүүч Энхбаатарын Эрдэнэбаатар, “Хариуцлагатай Монгол Залуу”-аар Техникийн шинжлэх ухааны доктор, Монгол улсын Шинжлэх Ухааны Академи болон Дэлхийн 3 дагч орнуудын Шинжлэх ухааны академийн “Шилдэг Залуу эрдэмтэн” шагналт Чоймаагийн Лодойравсал нар тус тус шалгарсан байна.

 Уг арга хэмжээнд Нийслэлийн Засаг дарга бөгөөд Улаанбаатар хотын Захирагч Г.Мөнхбаяр оролцож амжилт бүтээлээр дүүрэн их хотын залуусдаа мэндчилгээ дэвшүүлэхээр хүрэлцэн ирсэн.

Өнгөрч буй 2011 онд хийсэн бүтээснээрээ бусдыгаа хошуучлан манлайлсан шилдэг дүүргийн холбоодыг шалгаруулсан нь энэхүү арга хэмжээний бас нэгэн чимэг байлаа. Тэргүүн байранд Их жанжинаараа овоглосон Сүхбаатар дүүргийн НАМЗХ-ны хамт олон шалгарсан бол удаах байруудад Баянгол, Багануур дүүргийн НАМЗХ-ны хамт олон шалгарсан юм.

Шилдэгүүдийн дундаас шилдэгүүд нь оролцож шилдэгийн шилдэгүүдийн дундаас шилдэгүүд нь шигшигдэж их хотдоо өнгө гэрэл, дуу хуур, инээд баясал, урам зориг нэмсэн “Гэрэлт хотын залуус” цэнгүүнд оролцогч хүн бүхэн шинэ жил бүхэн ийм байгаасай гэж чин сэтгэлээ хуваалцаж байсан билээ.