“ Хурд”-ын залуус рок кафе нээнэ

 Сэтгэл гэгэлзүүлсэн дуунуудаар фэнүүдээ уяраадаг “Хурд” хамтлагийн залуус  хамтлагийнхаа амин сүнс болсон гитаруудаа алдаж хэсэг сандарсан ч, эргүүлж олсон сайхан хэрэг тохиогоод удаагүй буй.   Тэд хэдийгээр хайртай гитаруудаа олсон ч   тайзан дээр дахиж барилгүй хүндэтгэлтэйгээр  байрлуулна  гэнэ. Тус хамтлагийнхан уран бүтээлээсээ гадна  “Хурд” рок кафе нээхээр  шамдан ажиллаж байгаа  аж.   Өмнө тоглолтууддаа өмсөж байсан хувцас, барьж байсан хөгжим хэрэгсэл, хуучны гэрэл зураг зэрэг хамтлагийнхаа түүхийг өгүүлэх үзмэрийг уг кафед дэлгэхээр төлөвлөсөнөөс  гадна “Соёл-Эрдэнэ”, “Өргөө”, “Айзам” зэрэг Монголын рок попын анхдагч хамтлагуудын түүхийг харуулсан хэсгийг ч байрлуулна гэнэ.  Мартагдсан хуучин дуунуудыг бичлэгийг тэндээс олж болохоос гадна хамтлаг дуучид   ч шинэ уран бүтээлийнхээ нээлтийг  “Хурд” кафед хийх бололтой. Уг кафед “Хурд” хамтлагийн фэнүүд алжаалаа тайлахын зэрэгцээ тоглоомын төвд нь тоглож болох аж.  Хамтлагийн нэрээр нэрлэгдсэн рок кафе хойтонгийн өдийд нээлтээ хийх юм байна.

Г.Энхтуяа