Автобусны тоормос гэнэт барихаа больжээ

 Өнөө өглөө 9 цагийн үед  Сансрын тунелээс доош МУИС руу уруудах замд  “Тэнүүн-Огоо ХХК”-ны “Сансар-III, IV хороолол” чиглэлийн  УНА 45-07 дугаартай автобус нийт есөн машиныг мөргөсөн осол гарсан  билээ.  Аз болж зорчигдоос  хүний амь нас эрсдээгүй бөгөөд хөнгөн гэмтсэн таван хүнийг эмнэлэгт хүргэжээ. Осол гэмтэл аваагүй ч олон  хүн эд хөрөнгөөрөө хохироод байна.  Том оврын автобусны жолооч  “Би тунелээс уруудаад “шааригдаад” явж байсан. Ойролцоогоор 20-30 километр хурдтай гэсэн үг. Гэнэт л тооромз зуураад барихаа больчихсон.
 Өглөө болгон  техникийн бүрэн бүтэн байдлаа шалгуулдаг. Зүв зүгээр л байсан. Яагаад тоормос барихаа больсныг мэдэхгүй байна" гэсэн бол мөргүүлсэн жолооч нар “Гэрлэн дохио хүлээж байтал гэнэт л ард “тэнгэр нураад ирэв үү” гэмээр дуу чимээ гарч төд удалгүй өөрийн мэдэлгүй түрэгдэж урдах машиныг мөргөж уруудсан. Энэ автобус мэдээжээр дор хаяж 70-80 километрийн хурдтай явсан байх” ярьсан байна.  Уг хэргийг цагдаагийн байгууллага шалгаж байгаа ажээ.

Г.Энхтуяа