Sweetymotion амплаггед тоглолт хийнэ

“Sweetymotion” хамтлаг монголын шилдэг эрэгтэй дуучидтай хамтран “Амплаггед” тоглолтоо 3 сарын 8-нд Тусгаар тогтнолын ордонд хийнэ. Тус хамтлагийн бүсгүйчүүд хамтлагийн продюссер, хөгжмийн зохиолч Б.Чинбатын “Давтагдашгүй” тоглолтоор өөрсдийгөө мэргэжлийн хөгжимчид гэдгийг харуулсан билээ. Болороо, Сарнай нар даралтат хөгжим, Сүндрээ хийлээр Хөгжим бүжгийг төгссөн мэргэжлийн хөгжимчид юм.

Тус тоглолтонд Х.Төмөрбаатар, Х.Лхагвасүрэн, Н.Ганхуяг, Н.Дашдондог, Б.Жавхлантөгс нарын зэрэг шилдэг эрэгтэй дуучид, мөн морин хуурч Д.Шинэцог нар оролцоно.

“Sweetymotion” хамтлагийн 15 жилийн ой энэ жил тохиож байгаа. Тиймээс энэ жил олон ажил хийхээр төлөвлөжээ. Хамтлагийн гишүүн Сүндрээ “Бид энэ жил урьд ажиллаж байснаасаа ч их хөдөлмөрлөх болно. Хамтлаг ийм олон жил оршин тогтноно гэдэг хүн бүрт олдох хувь тавилан биш. Тиймээс бидэнд ийм боломжийг олгосон сонсогч, фенүүдээ энэ жил чадах чинээгээрээ баярлуулах болно” хэмээлээ.

Энэ удаагийн амплаггед тоглолт 15 жилийн ой угтсан анхны тоглолт бөгөөд саяхан “Жигүүр гранд” группийн Ерөнхийлөгч Д.Баттөрийн зохиосон “Хайрласан хайр” дуу олон түмнээс өндөр үнэлгээ аваад байгаа билээ.