Яруу найрагч Ц.Хулан: Намайг цэцгэн толгойтой отвертка гэсэн

Найрагч удамтай намбалаг хатагтай UBS телевизээс зохион байгуулсан “To be or not to be” шоуг шүүж байсан нь яруу найрагч Ц.Хулан. Түүний хоржоонтой, голыг нь олсон зөвлөгөөнүүд уг нэвтрүүлгийг чимж байсан гэдэгтэй санал нийлэх хүн олон биз ээ.  Харин Хулан хатагтайн хувьд  ном  уншаагүй өдрүүд  утгагүй,  нэг л  хоосон оргиж буйг анзаарснаасаа хойш  ном унших гэдэг миний амьдралын зайлшгүй хэрэгцээ юм  гэдгийг ойлгосон гэдэг.   Залуус  хэрэгцээтэй бүхий л мэдээллийг өдгөө цахим хэлбэрээр  олж авдаг  тул тус шоуг шүүх явцдаа  тэрээр цөөнгүй залууст  ном уншихыг түлхүү зөвлөж харагдсан. Нэвтрүүлгийн дараахан  түүнтэй таарсан нэгэн залуу “ Цэцгэн толгойтой отвертка минь танаар их бахархлаа. Ямар их уншсан юм бэ. Урлаг соёл гэлтгүй бүх чиглэлээр ямар их юм мэддэг юм” гэсэн гэдэг. Яагаад намайг ингэж хэлэв гэсэнд “Та толгой дээрээ их гоё цэцгэн малгайтай. Тэгээд отвертка шиг оролцогчдыг хөөрхөн чангалаад суудаг” гэжээ. Хулан хатагтайд  цэцгэн толгойтой отвертка нэр ихэд таалагдсан аж. Сонирхуулж хэлэхэд,  найрагч бүсгүйн толгой дээр донжтой залардаг гоёмсог цэцгэн малгай хоёр чемодан дүүрэн байдаг гэсэн шүү.

 Г.Энхтуяа