Орон сууцны зээл авах хүсэлтэй иргэд байгууллагуудын ачааллыг нэмэгдүүлэв

“100 мянган айлын орон сууц" хөтөлбөрийн хүрээнд иргэдэд жилийн зургаан хувийн хүүтэй зээл олгохоор шийдвэр гарсан. Үүнтэй холбоотойгоор орон сууцны зээлд хамрагдах хүсэлтэй иргэд шаардагдах бичиг баримтаа бүрдүүлж эхлээд байгаа бөгөөд үүний улмаас байгууллагуудын ачаалал нэмэгдээд байна. Тухайлбал,  зургаан хувийн хүүтэй 100 мянган айлын хүүтэй орон сууцанд хамрагдахын тулд Цагдаагийн ерөнхий газраас урьд нь ямар нэгэн гэмт хэрэгт холбогдож байгаагүй гэх тодорхойлолт авах ёстой.

Мөн УБЕГ-ын Эд хөрөнгийн бүртгэлийн газраас урьд нь орон сууц эзэмшиж байгаагүй гэсэн архивын лавлагааг авах ёстой. Гэтэл үүнээс болж Цагдаагийн ерөнхий газрын дэргэдэх  Мэдээлэл, судалгааны төвийн лавлагааны сангийн гадна уртаас урт дараалал үүссэн байна. Мөн УБЕГ-ын Эд хөрөнгийн бүртгэлийн газар ч иймэрхүү дүр зурагтай байна.

Энэхүү урт дарааллыг зохицуулахаар нийслэлийн Чингэлтэй дүүргийн жижүүрийн цагдаагаас нэмэлт хүч гарган ажиллаж байгаа аж. Түүнчлэн бүртгэлийн газрынхан иргэдэд дугаар өгч үйлчлэхээр болсон байна.

Тус газар өдөрт 400 дугаар тараах бөгөөд иргэдийг дугаарынхаа дагуу соёлтой үйлчлүүлэхийг хүсч байна. Мөн тус газрын ойролцоо архивын лавлагааг 70 мянган төгрөгөөр авч өгнө гэсэн хүмүүс олноор бий болсон тул иргэдийг өндөр үнээр лавлагаа авч хохиролгүй байхыг мөн сануулж байна. Учир нь ном журмаараа бол нэг иргэн архивын лавлагаа авахад 5000 төгрөг л тушаах ёстой аж. Тиймээс дээрх этгээдүүдэд луйвардуулахгүй байхыг сануулж байна.