Ардчилсан намын түүхэн ялалтад Ховдчуудын үүрэг их
Автор
| Zindaa.mn
2012 оны 06 сарын 26
Ардчилсан нам УИХ-ын сонгуулийн сурталчилгааны нээлтээ Баян Өлгийгөөс эхэлж Увс аймагт өртөөлүүлсэн. Харин энэ сарын зургаанд Ховд аймагт АН аас нэр дэвшиж байгаа УИХ ын гишүүн Д.Кёкүшюзан Батбаяр, Ховд аймгийн АН ын дарга Б.Пүрэвдорж нарын сонгуулийн сурталчилгааны нээлт Ховд хотын төв талбайд боллоо. Сонгуулийн сурталчилгааны нээлтэд АН ын дарга Н.Алтанхуяг, АН ын даргын зөвлөх, Онцгой байдлын сайд асан С.Отгонбаяр, АН ын жагсаалтын 18 д бичигдсэн залуусын төлөөлөл, УИХ ын гишүүн асан А.Эрдэнэбүрэн болон Ховд аймгийн Ардчилсан намын удирдлага, иргэд сонгогчид оролцсон юм.
АН ын дарга Н.Алтанхуяг нээлтийн үеэр “Ховд нутгийн ард түмэн Монголын түүхэнд томоохон гавъяа байгуулсан цогтой тэмцэгч ард түмэн. Манжийн дарлалыг үлдэн хөөсөн. Ардчилсан хувьсгалын анхны цуглааныг Ховдодоо зохион байгуулж улстөрийн товчоог огцрохыг шаардсан. Ардчилсан Ерөнхийлөгчийг нутгаасаа төрүүлсэн ардчилагчид. Харин энэ удаад Ардчиллын бүрэн төгс ялалтыг байгуулж Д.Кёкүшюзан Батбаяр, Б.Пүрэвдорж нарын төлөө саналаа өгч түүхэн гавъяагаа давтана гэдэгт итгэж байна. Ардчилсан намын түүхэн ялалтын жилд Ховдчуудын үүрэг их. Ардчилсан нам амласнаа хийж чаддаг. Ардчилсан нам иргэн бүрээ ажилтай, орлоготой болгохын төлөө хүний хөгжилд тулгуурлсан “Монгол хүн” хөтөлбөрийг боловсруулсан. Энэ хөтөлбөрийг бид хамтдаа олуулаа хэрэгжүүлж, үр шимийг нь олуулаа хүртэх болно. Энэ сонголтоор авилгал, шударга бус байдлыг таслан зогсооно. Үүнийг бид хамтдаа хийж чадна. Ингэхийн тулд АН аас нэр дэвшигчид, АН ыг дэмжицгээе. Бүгдээрээ хүн шиг амьдаръя, улс шиг хөгжье” гэлээ.
Сонгуулийн сурталчилгааны нээлтийн дараа АН ынхан Ховдын багшийн сургууль дээр иргэд сонгогчид, залуусын төлөөлөлтэй уулзлаа. Энэ үеэр АН аас нэр дэвшигч Д.Кёкүшюзан Батбаяр, Ховд аймгийн АН ын дарга Б.Пүрэвдорж нар намынхаа мөрийн хөтөлбөрийг иргэдэд танилцуулж, хөтөлбөрийн үр шимийг монгол хүн бүр тэгш хүртэх тухай онцолсон юм. Ховд аймагт төрийн алба ах дүүсэг болж цөөн хэдэн хүн тендер нэрийн дор мөнгө иддэг болсон нь шударга бус зүйл. Үүнийг бид өөрчилж Ховд аймагтаа хүн бүр эдийн засгийн тэгш боломжтой сайхан амьдармаар байна гэж байсан юм.
АН ын дарга Н.Алтанхуяг Ховд аймагт ажиллах үеэрээ тус аймгийн Эрдэнэбүрэн, Мянгат сумдад ажиллаж, иргэд сонгогчидтой уулзсан байна.
Ховд аймгийнхны хувьд Ардчилсан Ерөнхийлөгчийг төрүүлсэн тул энэ удаагийн сонгуулиар сонголтоо баталгаажуулж ардчиллын төлөө өгөх болно гэцгээж байсан юм.
УИХ-ын гишүүн Д.Кёкүшюзан Батбаяр: Ховд сайхан нутгаа өөрчилнө, хөгжүүлнэХовд нутагтаа УИХ ын сонгуульд нэр дэвшихээр ирсэндээ тун баяртай байна. АН аас хамтдаа нэр дэвшиж буй Б.Пүрэвдорж бид хоёр 1973 оны үхэртэнгүүд. Б.Пүрэвдорж дарга энд байгаа учраас би Ховд аймагт ирсэн. Итгэл даах, хийсэн бүтээсэн зүйлтэй үе тэнгийн залуутайгаа хамт нэр дэвшиж байна. Энэ жил бид хоёр Ховд аймгийг цэнхэртүүлнэ, ялна. Ховд сайхан нутгаа өөрчилнө, хөгжүүлнэ. Та бүгдийнхээ дэмжлэгээр төрөлх сайхан нутгаа хамтдаа өөрчилнө шүү. Ховд нутагтаа тугал хариулаад явж байсан 16-хан настай хүү арлын Япон орныг зорьж байлаа. Эр хүн тугал ч хариулдаг, туг ч барьдаг юм байна. Нутгийн чинь хүү өнгөрсөн дөрвөн жил туг барьж үзлээ. Дахиад туг баримаар байна. Нутгийн минь ахан дүүс ч дэмжиж байна. Хорин жилийн турш арлын Япон оронд Ховд нутгаа санаж, нутгийнхаа уул усанд залбирч мөргөж ирсэн. Энэ хүнд спортоор хичээллэж байхдаа нэг ч удаа бэртэл гэмтэл авч байгаагүй. Нутгийн минь уул ус харж явсан учраас тэр. Нутгийн түмнийхээ итгэлийг нутгийн чинь хоёр хүү алдахгүй. Бид хоёрыг дэмжээрэй.
Ховд аймгийн АН ын дарга Б.Пүрэвдорж: Ховд аймгийг өөрчлөх цаг нь ирсэнХовд аймгийн хүн ам жил ирэх тусам буурч, шилжилт хөдөлгөөн ихэссэн. Амьдрах сайхан боломжтой газар орон руу Ховдчууд маань нүүж байна. Ховдодоо сайхан амьдарч чадахгүй байгаагийн нэг том шалтгаан нь баялгийг цөөхөн гэр бүл хуваан идэж байна. Ховд аймагт өнгөрсөн дөрвөн жилд бусад аймгаас хамгийн их буюу 158 тэрбум төгрөгийн хөрөнгө оруулалт хийгдсэн. Аймгуудаас 30 аад тэрбумаар илүү. Төсвийн мөнгийг дэндүү үрэлгэн, үр ашиггүй зүйлд зарцуулсан. Ховд аймгийн Дарви сум хоёрхон жилийн өмнө улсын шилдэг сум болсон. Гэтэл хөлөө олсон Дарви сумыг шинэ байгуулалтад хамруулах нэрээр 12 тэрбум төгрөгөөр нүүлгэж зардал чирэгдэл удсан. Хажуу талын Мянгад суманд шон татах гэж найман тэрбум төгрөг зарсан. Ховдын Мөнххайрхан, Булганы хүүхэд ирж тоглох боломжгүй хүүхэд залуучуудын цэцэрлэгт хүрээлэнд арваадхан тоглоом суурилуулахын тулд арваад тэрбум төгрөг зарцуулж байна. Энэ их мөнгөөр Ховдын ард түмний жижиг дунд үйлдвэрийг хөгжүүлж ажлын байр нэмэгдүүлсэн бол сүүлийн жилүүдэд шилжсэн 16 мянган хүн төрсөн нутагаа орхиж Улаанбаатар руу шилжихгүй байсан.
Өнөөдөр тендер шалгаруулалтын нэрээр зөвхөн дарга нар, тэднийг тойрсон хэдхэн гэр бүл баялгаас хүртэж байна. Урьд нь дарга нар тендерийн 10 хувийг аваад Ховдын танил талуудаа шалгаруулдаг байсан. Гэтэл тэд маань Улаанбаатарт байгуулсан хувийн компаниуддаа Ховд аймгийн бүх тендерийг авч өгч байна. Энэ мэт булхайтай үйлдэл манай аймагт их болсон. Авилгал, хээл хахууль хамгийн их дэлгэрсэн газар гэхэд болно. Тийм учраас бид энэ бүхнийг өөрчлөх цаг ирсэн. Та бид сонголтоороо үүнийг өөрчлөх болно гэв.
Сэтгэгдэл ( 0 )