Сангийн яам “Капитал” банкинд хариу өгөөгүйн улмаас иргэд зээл авч чадахгүй байна

100,000 айлын орон сууц хөтөлбөрийн хэрэгжилтийн нэг хэсэг болох зээл олголт удааширч байгааг иргэд шүүмжлэх болсон. Зээл олгох ажил удааширч байгаа нь “Төрийн банк”, “Капитал” банк болон Сангийн яамнаас шууд хамааралтай болохыг эх сурвалжууд хэлж байна. Тодруулбал Капитал банк зээл олгож эхлээгүй бөгөөд энэ нь Сангийн яамтай хамтарч ажиллах гэрээн дээрээ тохирч чадаагүйтэй холбоотой гэнэ. Энэ талаар “Капитал” банкны зээлийн газрын дарга А.Гэрэлмаа:

-Манайх 400 гаруй иргэний матеиалыг хүлээж авсан.  Тэдгээрийн заримынх нь судалгааг хийгээд зээл олгоход бэлэн болсон. Сангийн яамнаас зээл олгох эх үүсвэрийг банкинд ямар хугацаанд олгох нь тодорхойгүй байна. Хэрвээ энэ асуудал шийдэгдвэл бид зээл олгож эхлэх болно. Хэдийгээр 100,000 айлын орон сууц хөтөлбөрийн зээлийг “Төрийн банк”-аар олгуулна гэсэн яриа гарч байгаа ч манайхаас зээл олгохгүй гэсэн албан ёсны шийд гаргаагүй. Өнөөдрийн байдлаар материалаа өгөөд хүлээж байгаа зээлдэгч цөөнгүй байна. Манайхаас барилгын санхүүжилтийн зээл авсан компаниас байр авах гэж буй иргэд материалаа буцаалгүй хүлээсээр байгаа. Хүлээхгүй гээд материалаа авсан иргэд ч байна гэж мэдэгдлээ.

Харин тус банканд материалаа өгсөн иргэд буцаан авах тохиолдолд эргэж ОССК-тоо хандаж материалаа “Төрийн банк”-нд өгөх бөгөөд дахин материалыг нь нягтлах ээлжийг хүлээн дугаарлах юм байна.

А.Баярмаа