Замбалгарав:Дипломын ажлаа Камертон хамтлагаар хийж байлаа

“Камертон-2” шоунд шүүгч Ганаагийн сэтгэлийг хөдөлгөж уйлуулаад амжсан авьяаслаг оролцогч  Замбалгаравтай ярилцлаа.

-“ Камертон-2” шоунд оролцох хүсэл хэрхэн төрсөн бэ?

-Чанартай, чадалтай, сайн дуулдаг хамтлагт дуулах гэсэн мөрөөдлөө биелүүлэхээр энэ тэмцээнд оролцохоор болсон.

-Ер нь хэзээнээс дуулж эхэлсэн бэ?

-7-р ангиасаа дуулж эхэлсэн. 10-р ангиа төгсөөд СУИС-д элсэлтийн шалгалт өгч тэнцээд Эстрад дуулаачийн ангид таван жил сурсан. Ч.Насантогтох багшийн удирдлаган дор дуучин мэргэжлийг эзэмшсэн. Багш маань хувь хүнийхээ хувьд ч, мэргэжлийн хувьд ч маш мундаг хүн дээ.

-Өөрийн чинь хувьд II шатанд дуучин МУГЖ Т.Ариунаагийн “Зөвхөн тэр хайрандаа” дууг дуулж шүүгчдээс магтаалын үгийг харамгүй сонссон. Магтаалын зэрэгцээ шүүмжлэл сонсов уу. Хамгийн том шүүмжлэлийг хэн хэлсэн бэ?

-II шатанд дуулсан дуу минь давхардалгүй ганцхан надад таарсан. Маш их юм бодож дуулсан. Би дуу дуулахдаа их судалж, бараг нойр хоолгүй бодож дуугаа ойлгож дуулдаг. Нэлээн сайн бэлдсэн ч өөрийн хариуцлагагүйн улмаас 2-р шатанд орохынхоо өмнө хатгаа аваад эмнэлэгт 7 хоног хэвтэж, хүчтэй эм тариагаар бөмбөгдүүлсэн. Гарч ирэнгүүтээ 2-р шатны шалгаруулалтдаа орсон. Хоолойн форум алдсан учир сэтгэлдээ хүртэл сайн дуулж чадаагүй. Аз таараад дахиад нэг дуулах завшаан таарвал маш гоё дуулна гэж мөрөөдөж байгаа. Гэхдээ дуулсны дараа хүмүүс маш сайхан хүлээж авсанд нь их баярласан. Ер нь магтаал, шүүмжлэл хоёр тэнцүүхэн л байгаа гэж бодож байна.

-Шүүгчдийн зүгээс өөрийг чинь анхнаасаа энэ дууг дуулах ёстой байсан юм биш үү гэсэн үнэлэлтийг өгсөн. Энэ тухайд?

-Би ийм магтаалаас их айдаг. Хүмүүст тэгж хүрсэн бол сайхан. Гэхдээ гол нь би өөрийгөө байнга голдог. “Өөрийгөө чи арай болоогүй шүү” гэж өөртөө хэлдэг. Учир нь сонсдог дуунууд маань нарийн, хэт мэргэжлийн тал руугаа байдаг. Өдөр болгон л хичээнэ, бас дахин хичээнэ гэж өөртөө хэлдэг.

-2-р шатны дуугаа хэд хоног бэлтгэв?

-Бараг л 14-20 хоног бэлтгэл хийсэн. Хүний чихэнд сонсголонтой байхаар дуун дээрээ маш их ажилласан. Эхний хоёр бадаг дээрээ хоолой зангираад уйлах шахсан.

-Энэ тэмцээнд орсноор өөрийн чинь хувьд ямар нэгэн ахиц дэвшил гарсан уу?

-Энэ тэмцээнд янз бүрийн хүмүүс оролцож байгаа. Хүүхдүүдийн тэмүүлж байгаа тэмүүлэл зүтгэлийг хараад эрч хүч авдаг. Өөрийн хувьд 2-р шатанд шүүгчид намайг тарган, үсээ хуссан байсан болохоор хүйтэн царайтай байна гэсэн. Иймээс өөртөө анхаарч, 2-3 кг турж, үсээ ургууллаа. Дараагийн шатандаа нүдний шил зүүхгүй гэж бодоод байгаа. Зарим хүмүүс намайг солир юм уу гэж асуудаг. Би шил зүүх дуртай л болохоос ямар нэг гажигтай хүн биш л дээ.

-Өөрийг чинь гадуур явж байхад хүмүүс хэр их таньж байна?

-Гайгүй ээ, таних нэг нь танина. Танихгүй нэг нь танихгүй. Би дандаа нүдний шилтэй шалгаруулалтанд ордог болохоор хүмүүс нэг их таньдаггүй юм. Харин гадуур гарахдаа шилээ авдаг. Нүдний шилэнд бүр бага байхын л дуртай байсан. Хүмүүс онигор болохоор нүдээ нуух гэж шил зүүдэг гэж ойлгодог ч энэ нь ташаа ойлголт. Би гоё нүдний шил, үнэртэй усны хоббитой.

-Өөрийг чинь уран бүтээлийн хувьд ирлэдэг хүн хэн бэ?

-Би өөрөө. Хааяа сэтгэл санааны хүнд байх үедээ Ч.Насантогтох багш дээрээ очиж зөвлөгөө авдаг.

-Өөрийн гэсэн уран бүтээл гаргаж байсан уу?

-Үгүй ээ. Надад өөрт гоё дуунууд бий л дээ. Гэхдээ 7, 8 жил дуулж байж одоо л дууныхаа учрыг гадарладаг болоод байна. Одооноос уран бүтээл хийе гэж бодож байгаа. Болоогүй байж дуулахаас айдаг.

-Од гэж ямар хүмүүсийг хэлдэг вэ?

-Би од гэдэг үгэнд их дургүй, бас ойлгодоггүй. Од гэгдээд байгаа хүмүүс нь өөрсдөө од шиг байж чаддаггүй болохоор инээдтэй санагддаг юм. Од гэдэг чинь тэнгэрийн одыг хэлдэг болохоос хүнийг хэлдэггүй биз дээ. Эсвэл тэр утгаар нь ойлгох гээд байгаа бол од гэдэг чинь бүгдэд харагдахуйц асар дээр гялалздаг. Миний хувьд хүн байгаад хүн шиг уран бүтээл хийх юмсан л гэж боддог.

-Хэзээнээс бие даасан уран бүтээлээ хийх вэ?

-Миний хувьд “Камертон-2” шоу тэмцээнд маш их золиос гаргаж, ач холбогдол өгч орж байгаа. Эхлээд тэмцээнийхээ үр дүнг үзнэ. Үнэхээр надад аз таараад мундаг продюссертай том багт ажиллах завшаан гарвал хамтлагаараа уран бүтээлээ хийгээд  явна. Чадна гэдэгтээ итгэлтэй байгаа. Хэрвээ чадахгүй хасагдвал тэр цагаасаа эхлээд өөрийнхөө бие даасан уран бүтээлийг хийж эхэлнэ.

-3-р шатандаа бэлдэж эхэлсэн үү?

-Одоогийн байдлаар манай баг 9 хүний бүрэлдэхүүнтэй, бэлтгэлээ 80-90 хувьтай хангасан. Тусдаа найруулагч, бүжиг дэглээч авч ажиллаж байгаа. Миний хувьд III шатандаа Ганаа ахын дуулсан “Чамтай хамт явмаар байна” дууны 1-р бадгийг дахилттай нь дуулна. Бас их гоё дуу таарсан учраас яаж дуулна даа л гэж санаа зовж байна. Хүмүүсийн сэтгэлд хоногшсон дууг хамаагүй эвдэж болохгүй тул дуугаа л аятайхан дуулахыг хичээж байгаа.

-Өөрийн чинь хувьд хамгийн их хүндэлж, шүтдэг хамтлаг дуучин хэн бэ?

-Хамгийн их хүндэлж шүтдэг хамтлаг бол Камертон. Одоо надад энэ хамтлагийн мэдэхгүй дуу нэг ч байхгүй. Бүгдийг нь дуулахад нэг ч хэмжээ алдахгүй дуулж чадна. Хүүхэд байхдаа Болд ахын гаргадаг байсан бүх нугалаануудыг хийж чаддаг байсан. Тэр ч утгаараа СУИС-ийг төгсөхдөө Камертон хамтлагаар дипломын ажлаа хийж байлаа.

-Камертон-2 шоуны оролцогч дундаас хамгийн хүчтэй өрсөлдөгч хэн байна вэ?

-Бүгдээрээ л миний хүчтэй өрсөлдөгч, бас найзууд. Гэхдээ би анх оюутан болохдоо өөрөө заалгаж, сурсан учраас нэгнийхээ чадахгүй болохгүй юман дээр нь зааж, зөвлөчих юмсан л гэж боддог.

-Ер нь багийнхаа дасгалжуулагчийг хийж байна гэж ойлгож болох юм байна?

-Тэгж ойлгож болно. Манай багийнхан чинь намайг ШИ-ФУ багш гээд нэрлэчихсэн. Энэ тэмцээнд орсноос хойш “би дуулах ур чадвараа сайжруулах гэсэн юм” гэсэн хүмүүс над руу залгасан. Би хүнийг сургах болоогүй байгаа тул “би өөрөө дуулж сураагүй байна” гэж хэлдэг.

-Багийнхан чинь зөвлөгөөнүүдийг чинь хэр хүлээн авч, өөртөө тусгаж байна?

-Манай багийнхан сайн хүүхдүүдтэй, хоорондоо хагаралдаад байх юм байдаггүй. Манай баг хоорондоо маш сайн ойлголцож, ажил ч урагштай, маш сайн явж байгаа.

-Өдөрт хэдэн цагаар бэлтгэл хийж байна вэ?

-7-8 цаг хийж байгаа. 18:00-24:00 цаг хүртэл бэлтгэл хийдэг. Ажил ихтэй үед бол шөнийн 2:00 цаг хүртэл хийдэг.

-Гэр бүлээ танилцуулаач?

-Манай эхнэр СУИС-ийн эстрадын ангийг төгссөн. Хоёулаа урлагийн хүн болохоор бие биенийхээ уран бүтээл дээр хамгийн сайн зөвлөгч нь байж, бие биенээ маш сайн ойлгодог. Мөн хувь хүмүүсийн хувьд ч бид хоёр үзэл бодол яг нийлдэг.

-Анх эхнэртэйгээ яаж танилцаж байв?

-Манай сургуульд их даруухан хөөрхөн охин яваад л байсан. Нэг газар хамт дуулаад анх танилцаж байлаа. Анх эхнэртээ Титэм хамтлагийн Тайванбат ахын дуулсан  “Цэнхэр сарны туяа” гэж дууг дуулж өгч байсан.

Ярилцсан Д.Төгс