Аймгуудын наадам тэмдэглэх хуваарь

Аймгийн баяр наадмуудын хувиар гарч эхэллээ. Энэ жил хамгийн эхэнд Говь-Алтай аймаг долдугаар сарын 6, 7-ны өдрүүдэд наадмаа хийхээр Засгийн газарт саналаа өгчээ. Дараа нь Өмнөговь аймгийн наадам долдугаар сарын 8, 9-ний өдрүүдэд болно. Мөн Баянхонгор, Дорнод, Сэлэнгэ, Төв, Хэнтий аймаг 9, 10-ны өдрүүдэд наадамлана.

Харин Булган, Говьсүмбэр, Дорноговь, Орхон, Өвөрхангай, Хөвсгөл аймаг 10, 11-ний өдрүүдэд наадмаа хийх аж. Хөвсгөл аймаг Төрийн шагналт, академич Б.Ширэндэвийн мэндэлсний 100 жилийн ойн баярыг энэ үеэр тэмдэглэхээр төлөвлөжээ. Завхан, Дархан-Уул аймаг наадмаа 11, 12-нд хийхээр болсон байна.

Долоодугаар сарын 28, 29-ний өдрүүдэд Баруун бүсийн даншиг наадам болно. Тус наадам Баян-Өлгий аймагт энэ жил болох бөгөөд өлгийчүүд наадмаа даншигтай хамтатгаж хийхээр Засгийн газарт санал оруулжээ. Мөн Дундговь аймаг 28, 29-нд зохиогдох говийн бүсийн даншигтай аймгийнхаа наадмыг хамтатган хийхээр тогтжээ.

Х.Даваа