У.Хүрэлсүхэд эрүү үүсгэжээ

Өчигдөр ээлжит бус чуулганы  үеэр УИХ-ын гишүүн У.Хүрэлсүх УИХ-ын гишүүн Г.Баярсайхантай маргалдаж нударга зөрүүлсэн. Энэ хэргийн улмаас Г.Баярсайхан У.Хүрэлсүхийг Эрүүгийн цагдаагийн газарт өгсөн байна.
    Үүнтэй холбогдуулан УИХ-ын гишүүн У.Хүрэлсүхэд Эрүүгийн хуулийн тусгай ангийн 181.1-т зааснаар бусдыг илтэд үл хүндэтгэн хүч хэрэглэхээр заналхийлж, нийгмийн хэв журмыг ноцтой зөрчсөн хэргээр эрүү үүсгэн шалгаж эхэлжээ.
    Хэрвээ  У.Хүрэлсүхийн гэм буруутай нь тогтоогдвол хөдөлмөрийн хөлсний доод хэмжээг 51-100 дахин нэмэгдүүлсэнтэй тэнцэх хэмжээний мөнгөөр торгох, эсвэл 3-6 сараар баривчлах, цаашлаад гурван жил хүртэл хорих ялаар шийтгэгдэх аж.

Энэ талаар тодруулахаар УИХ-ын гишүүн У.Хүрэлсүх рүү утас цохьсон боловч авахгүй, хэд хэдэн удаа таслав. Улмаар УИХ-ын  гишүүн Г.Баярсайхантай холбогдов.

- Таны биеийн байдал ямар байна вэ?

- Яахав ээ. эмнэлэгт үзүүлсэн.

- Шүүх эмнэлэгт үзүүлсэн юм уу? Эсвэл хувийн эмнэлэгт үзүүлсэн юм уу?

- Шүүх эмнэлэгт

- Эмнэлэгийн дүгнэлт гарсан болов уу?

-Өмгөөлөгч энэ хэрэг дээр ажиллана.

- Эрүүгийн хэрэг үүсгэсэн гэж байсан. Үнэн үү?

- Энэ хэрэг дээр манай өмгөөлөгч ажиллаж байгаа. Түүнээс тодруулсан нь дээр гэв.

 Парламентын гишүүд анх удаа шахам нударга зөрүүлсэн нь энэ бөгөөд ёс зүйн хариуцлага хүлээлгэх төлөвтэй байна.  УИХ-ын гишүүн Г.Баярсайхан шүүх, цагдаагаар явах сонирхолгүй байгаа ч Хууль зүйн сайд Х.Тэмүүжин сүрийг үзүүлэхээр төлөвлөөд байгаа гэх "бор шувуу" ордонд яригдаж байгаа юм.

 А.Баярмаа