Дэд сайд нарыг маргааш томилно

Шинэчлэлийн Засгийн газрын ээлжит хуралдаан маргааш болно. Маргаашийн хуралдаанаар дэд сайд нарыг томилох сураг дуулдаж байна. Дэд сайд нарыг томилохдоо сайд нарын намын харъяаллыг харгалзан үзэх гэнэ. Өөрөөр хэлбэл АН-ын сайдад өөр нам, эвслийн дэд сайдыг “бэлэглэх” юм байна. Хууль зүйн сайд, УИХ-ын гишүүн Х.Тэмүүжин АН-ын гишүүн  болохоор “Шударга ёс” эвслээс хуульч Э.Эрдэнэжамъянг дэд сайдаар, Эдийн засгийн хөгжлийн сайдаар УИХ-ын гишүүн Н.Батбаяр АН-ын гишүүн тул дэд сайдаар нь МАХН-ын гишүүн О.Чулуунбатыг томилох бол Н.Энхбаярын туслах Б.Тулга Байгаль орчин, Ногоон хөгжлийн сайд С.Оюуны дэргэд дэд сайдын алба хаших аж. Харин МҮАН-аас дэд сайдад нэр дэвшигч Б.Цогтгэрэлийн хувьд Үйлдвэр хөдөө, аж ахуйн сайд Х.Баттулгыг түшиж, дэд сайдаар ажиллах нь тодорхой болоод байгаа.  

Харин АН-аас дэд сайдын суудалд Гадаад харилцааны яамны Консулын газрын дарга Д.Ганхуяг, Бельги улсад элчин сайд байсан А.Баттөр, МоАХ-ны нарийн бичгийн дарга Г.Байгальмаа, Төв аймгийн АН-ын дарга Д.Доржпүрэв, Баян-Өлгий аймгийн АН-ын дарга Х.Ержан, Ардчилсан залуучуудын холбооны дарга Ж.Амарсанаа, “Гангар” компанийн захирал Б.Пүрэвээ, "Комит сервис" компанийн захирал Э.Тамир, АН-ын нарийн бичгийн дарга Б.Ургамалцэцэг, ҮЗХ-ны гишүүн н.Туваан, ТӨХ-ны дэд дарга О.Эрдэнэбулган нарыг томилохоор төлөвлөөд байгаа ажээ.  

Өмнө нь дэд сайд нарыг томилох асуудлыг хэд хэдэн удаа хэлэлцэх гэсэн боловч тодорхойгүй хугацаагаар хойшлуулсан юм. Учир нь “бялуу хуваалт”-ын хуваарилалт зарим нэгэнд нь шог санагдсан болохоор ийнхүү хойшилсон гэх “бор шувуу” нисэж байна.

П.Төгөлдөр