Сонгуулийн зардалтай холбоотой тогтоолын төслийн анхны хэлэлцүүлгийг хийв

    УИХ-ын Төрийн байгуулалтын байнгын хороо өнөө өглөө хуралдаж, “Сонгуулийн нэмэлт зардлын тухай” УИХ-ын тогтоолын төслийн анхны хэлэлцүүлгийг хийлээ.

    Монгол Улсын Засгийн газраас 2012 оны 11 дүгээр сарын 01-ний өдөр УИХ-д өргөн мэдүүлсэн энэхүү төслийг хэлэлцэх эсэх асуудлыг Төрийн байгуулалтын байнгын хороо 11 дүгээр сарын 06-ны өдрийн хуралдаанаараа хэлэлцээд төслийг хэлэлцэхийг санал нэгтэйгээр дэмжин, УИХ-ын чуулганы нэгдсэн хуралдаанд оруулах нь зүйтэй гэж үзсэн байна. УИХ-ын чуулганы нэгдсэн хуралдаанаас дээрх төслийг хэлэлцэхийг дэмжсэнээр анхны хэлэлцүүлэг хийлгэхээр тус байнгын хороонд шилжүүлсэн билээ.    

     Уг тогтоолын төслийг “Аймаг, сум, дүүргийн ИТХ-ын сонгуулийн тухай хуулийн 10 дугаар зүйлийн 10.5 дахь хэсгийг хэрэгжүүлэхтэй холбогдсон 1.843.4 сая төгрөгийн зардлыг Хууль зүйн сайдын төсвийн багцад тусгаагүй тул дээрх хуулийн заалтыг хэрэгжүүлэх боломжгүй байна” гэсэн үндэслэлээр боловсруулжээ.

    Байнгын хорооны өнөөдрийн хуралдаан дээр хэлэлцэж буй асуудалтай холбогдуулан УИХ-ын гишүүн Д.Батцогт, Р.Гончигдорж нарын гаргасан зарчмын зөрүүтэй саналын томьёоллоор гишүүдийн саналыг хураахад бүх санал дэмжигдсэний дотор “Сонгуулийн нэмэлт зардлын тухай” гэсэн тогтоолын төслийн нэрийг “Сонгуулийн зарим зардлыг санхүүжүүлэх тухай” УИХ-ын тогтоолын төсөл болгон өөрчлөх санал дэвшүүлж, УИХ-ын чуулганы нэгдсэн хуралдаанд оруулан хэлэлцүүлэхээр боллоо.

       Уг төслийг чуулганаар хэлэлцсэний дараа Төрийн байгуулалтын байнгын хороо өнөөдөр 14 цагаас дахин хуралдаж эцсийн хэлэлцүүлэг хийхээр болов.

А.Баярмаа