Автозамыг сайжруулах нэрийн цаана ”Сод Монгол”-ын ашиг сонирхол нуугдав уу?

Хотын төвийн А бүс, хүнсний дөрөвдүгээр дэлгүүрийн орчимд байрлах Элэг судлалын клиник төвийн Эмийн үйлдвэрийн газар руу өчигдөр өглөөний 06.00 цагт Нийслэлийн Автозамын газрынхан хүчээр халджээ. Энэ талаар ubsonin.mn-д мэдээлжээ.

Байгууллагын жижүүрийг гэмтээж, хашааг нь нураан, эмийн үйлдвэрийн үүдийг хааж, зам тавина хэмээн засварын машин багаж техникээ ажиллуулж эхэлсэн байна. Байгууллагын ажилчид эсэргүүцлээ илэрхийлсэн ч Сүхбаатар дүүргийн 10 гаруй цагдаа ирж, тэднийг барьж хашааг нь хүчээр буулгажээ.

Энэ талаар тус эмийн үйлдвэрийн технологич эм зүйч Ч.Янжинсүрэн "Энэ үйл явдал хоёр дахь удаагаа давтагдаж байна. 14 хоногийн өмнө оройны 20.00 цагийн үед мөн л ингэж манай газар руу дайрсан. Энд зам тавих ямар ч шаардлага байхгүй. Баруун болон зүүн талдаа 30 метр зайтай хоёр төв зам бий. Тавих шаардлагатай байлаа гэхэд Нийслэлийн Ерөнхий төлөвлөгөөний газраас батлагдсан зураг төсөлтэй, НИТХ-ын шийдвэртэй байх ёстой. Гэтэл үзүүлж байгаа бичиг нь ямар ч тамга тэмдэггүй, барилгын ноорог цаас шиг зүйл үзүүлж байгаа. Манай байгууллагын эзэмшил газрыг автозам болгох ямар нэгэн албан бичиг ирүүлээгүй. Амралтын өдөр, ажлын бус цаг, харуй бүрийг далимдуулан ингэж дайрч байгаа нь цаанаа ямар нэгэн том эрх ашиг байгаа нь тодорхой” гэлээ.

Байгууллагын ажилчид энэхүү хууль бус үйл ажиллагааны цаана "Сод Монгол”-ын Анандбазар байгаа хэмээн хэлж байлаа. Учир нь Түргэн тусламжийн төвийн автобаазын шатахуун түгээх станц хувьчлагдахад Анандбазар худалдан авчээ. Одоо тэнд "Сод Монгол” ШТС үйл ажиллагаа явуулж байна.

Элэг судлалын клиник төвийн менежер Б.Тунгалаг "Содмонгол” шатахуун түгээх станц яг замын хажууд бий. Тэгэхээр ашиг орлого олох гэсэн "Содмонгол” группийн эрх ашиг энд явж байна. Түүнээс биш энд зам тавих ямар ч шаарлага байхгүй. Нийслэлийн Автозамын газрын зүгээс бидэнд үзүүлсэн бичигт 21 дүгээр байр орчмын замыг сайжруулах гэсэн ерөнхий зүйл байсан. Гэтэл манайх руу цагдаагаар далайлган дайрч байна. Өглөө хоёр цагдаа дагуулж орж ирээд манай ажилчдыг хөдөлгөөнгүй зогсоож байгаад урд хашааг буулгасан. Бидний зүгээс эсэргүүцэл үзүүлсэн. Гэвч дараа нь Сүхбаатар дүүргийн нэгдүгээр хэлтсийн ахмад Алтангэрэлээр ахлуулсан 10 гаруй цагдаа ирлээ. Хамгийн харамсалтай нь мөнгөтэй хүмүүсийн халаасанд манай төрийн цагдаа, Нийслэлийн автозамын газрын удирдлагууд оржээ. Бид энэ асуудал хатуу байр суурьтай хандаж, өөрийн эзэмшлийн газраа булаалгахгүй, тэмцэнэ” гэлээ.