УТААТАЙ МЭДЭЭ: Улстөрчид хэрэлдэх зуур нялхсын амь тасарч байна

Улаанбаатар хотын агаарын бохирдол иргэдийн эрүүл мэндийн тулгамдсан асуудал болж, хүүхэд болон жирэмсэн эмэгтэй бүрийг эрсдэлд оруулах хэмжээнд хүрээд байна. Албан ёсны судалгаагаар 2018 оны эхний арван сард 120 хүүхэд хатгалгаа өвчний улмаас нас барсан бол 1200-1300 орчим том хүн агаарын бохирдлын шалтгаантайгаар өвдөж, нас барсан гэсэн гашуун мэдээлэл байна.

Утааны хор уршиг нь бидний чихэнд хэдийнэ дасал болоод байгаа амьгүй төрөлт, дутуу төрөлт, жин багатай төрөлт, хатгалгаа, бронхит, гуурсан хоолойн багтраа өвчин зэргээр хязгаарлагдахаа больж, бага насны хүүхдийн нас баралтын шалтгаан болж байгааг албаныхан ил болгож эхэллээ.

Агаарын бохирдлоос үүдэж нас барсан гэх хамгийн сүүлийн тохиолдлыг энд дурдъя. Өнгөрсөн долоо хоногийн пүрэв гарагт буюу нэгдүгээр сарын 10-ны өдөр нийслэлийн Чингэлтэй дүүрэгт дөрвөн настай охин ханиад нь хүндэрсний улмаас нас барсан, харамсалтай явдал болжээ. Тус дүүргийн 12 дугаар хороонд түр оршин суугч, залуу гэр бүлийн дөрвөн настай Ч гэх охин өндөр хэмээр халуурч, хорооны өрхийн эмнэлэгт хүнд байдалтай ирсэн ч эмчилгээ үр дүнд хүрэлгүй, амьсгал хураажээ.

Хэргийн мөрөөр манай сурвалжлах баг Чингэлтэй дүүргийн 12 дугаар хорооны “Шэжиддүг” өрхийн эрүүл мэндийн төвийг зорин очлоо. Биднийг очих үед эмнэлгийн ачаалал маш их байсан ба өвчтөнүүдийн 90 гаруй хувь нь бага насны болон нярай хүүхдүүд байв. Ачаалал их байгаатай холбоотойгоор тус эмнэлэг өндөржүүлсэн бэлэн байдалд шилжиж, уртасгасан цагаар ажиллаж байгаа аж.

Тухайн өдөр болсон хэрэг явдлын талаар “Шэжиддүг” өрхийн эрүүл мэндийн төвийн дарга, их эмч Ц.Цэрэндолгороос тодрууллаа.

Тэрбээр “Өнгөрсөн пүрэв гарагийн өглөө 10:00 цагийн үед манай хорооны оршин суугч дөрвөн настай хүүхдээ дагуулж ирсэн. Хүлээж авсан эмч хүүхдийг үзэхэд биеийн байдал тааруу, захын хөхрөлттэй байсан. Манайхаас анхны түргэн тусламж үзүүлж, хүчилтөрөгчийн аппарат залган, зүрхний массаж хийсэн. Улмаар Яаралтай түргэн тусламжид шилжүүлсэн. Өмнө нь хүүхэд манай эмчид үзүүлж байсан. Тухайн үед эмч яаралтайгаар эмнэлэгт хэвтэх бичиг хийж өгөөд, эмнэлэгт хэвтүүлсэн юм билээ. Хүүхдийн эцэг, эхийн хэлснээр бол эмнэлэгт хэвтэн эмчлүүлж байгаад эмнэлгийн ачааллаас болоод 4, 5 хоноод гэртээ гарч, гэрээр эмчилгээ хийж байж. Харин хүүхэд нас барахынхаа өмнөх орой өндөр халуурч байсан учраас ээж нь парацетамол өгсөн боловч хүүхэд шөнөжингөө уйлсан гэсэн мэдээллийг ээж нь манай эмчид тэмдэглүүлсэн байсан. Ерөнхийдөө манай эмнэлэг ачаалал ихтэй, ихэвчлэн бага насны хүүхдүүд хатгалгаа, ханиад гэсэн оноштой ирж байна. Ханиадны шинж тэмдэг илэрмэгц маш хурдан хүндэрч байгаа тал ажиглагдаж байгаа” гэлээ.

Шүүх эмнэлгээс талийгаач охиныг уушигны хатгалгаа, гуурсан хоолой агшсанаас үүдэн агааргүйдэж, нас барсан гэх урьдчилсан дүгнэлт гаргаад байгаа аж.

 

Дээрх болсон явдлаас харахад, нийслэл хотын агаарын бохирдол түүний хохирогчдын дийлэнх нь бага насны хүүхдүүд болж байгаа нь зүрх зүсэм үнэн болж таарлаа.

Нийгмийн эрүүл мэндийн үндэсний төв болон НҮБ-ын Хүүхдийн сангаас явуулсан судалгаагаар, хэрэв агаарын бохирдлыг бууруулах арга хэмжээг нэн даруй авахгүй бол 2025 он гэхэд агаарын бохирдлоос үүдсэн хүн амын дундах нас баралт 33 хувиар нэмэгдэж, жил бүр 240 гаруй хүн нас барах эрсдэлтэй гэдэг тооцоолол гарчээ.

Ийнхүү бодит тоо баримт хөвөрч, бид бяцхан үрсээ шил дараалан алдаж байгаад шийдвэр гаргагчид “буруутай”. Тэд хүн ам, иргэдийнхээ өмнө хариуцлага хүлээсэн, гаргасан шийдвэрийнхээ нөлөөллөөр бидний эрхийг хамгаалах үүрэгтэй албан тушаалтнууд. Гэвч “буруутнууд” улс төрийн жагсаал цуглаан хийж, талцан хэрэлдсээр... Энэ хооронд утаа үр хүүхдүүдийн маань хоолойг боомилж, аажмаар үхэлд хөтөлж байгаа нь айдас төрүүлж байна.