Бата айлдсан нарны баяр казах соёлд хөтлөв

Улаанбаатар хот дахь Баян-Өлгий аймгийн залуучуудын холбоо, Монголын залуучуудын холбоо /МЗХ/ хамтран өнөөдөр /2019.03.20/ “Наурыз- 2019” казах ёс заншлыг сурталчлах өдөрлөг зохион байгууллаа. Тус өдөрлөгт УИХ-ын гишүүн асан А.Бакей, Баян-Өлгий аймгийн залуучуудын холбооны дарга Б.Ербулан, Монголын залуучуудын холбооны ерөнхий нарийн бичгийн дарга Б.Бэлгүтэй болон Улаанбаатар хотод суралцдаг оюутан, залуус оролцсон юм. Энэ үеэр Монгол улсын хөгжил цэцэглэлтэд оруулсан хувь нэмрийг үнэлж Б.Жандос, Г.Берденбек, А.Актанбердин нарыг МЗХ-ны тэргүүний залуу цол тэмдгээр шагналаа. “Наурыз-2019” өдөрлөгт оролцсон хүмүүсийн сэтгэгдлээс хүргэе.  
 

-Наурызын баярыг угтан Улаанбаатар хотод ажиллаж, амьдардаг Казахын ард түмэн болон Монголын залуучуудын холбоо казах үндэстний ёс, уламжлалыг сурталчлах энэхүү өдөрлөгийг гурав дахь жилдээ амжилттай зохион байгуулж байна. Гол зорилго гэвэл казах түмний ёс заншлыг харуулах. Монголоор бол цагаан сартай адил ахмад настнууд дээрээ золгож баярладаг. "Наурыз-2019" өдөрлөгийг дэмжиж ажилласан Монголын залуучуудын холбооны хамт олонд оролцогчид талархал илэрхийлж байна.

-Наурыз буюу нарны баяр маань хүн бүрт, айл бүхэнд сайхан халуун дулаанаа хайрлаж, амьд амьтан бүхэн амь орж, идээ будаа арвин манай Монгол эх орны ард түмэн минь элбэг, сайхан байхын өлзийтэй ерөөлийг өргөн дэвшүүлье. Идээ будааны дээдээр ирсэн зочдыг дайлдаг уламжлал эрт дээр үеэс тогтсон. Тэр уламжлалын дагуу МЗХ гурав дахь жилдээ Наурызын баярыг олон түмэнтэйгээ тэмдэглэж байна. Баярын минь хамгийн хүндтэй идээ бол хонины толгой. 

 
-Юуны өмнө танай сайтын уншигчдад айлчлан ирж буй Наурызын баярын мэндийг хүргэе. Казахын ард түмэн Наурызын баяраа жилээс жилд өргөн, дэлгэр тэмдэглэж ирсэн. Наурызын баярыг казах ард түмэн олон мянган жилийн турш нүүдэлчдийн хаврын хэмээн тэмдэглэж, билэгдсээр өдий хүрсэн. Зөвхөн Наурызын баяраар ч биш Казахын ард түмэн олон янзын дайллага, цайллага, хурим найрандаа тусгайлан зассан ширээндээ хамгийн ахмад настангаараа Бата буюу ерөөл айлдуулж, идээ будаандаа хүрдэг уламжлалтай. Бата гэдэг маань Монголоор ерөөл гэсэн утгатай үг. Ерөөлямар ч байж болно. Ард түмэн эрүүл энх, улс эх орон минь энх тунх байгаасай гэх утга бүхий үгсийг бол ямар ч баяр байсан хэлдэг. 

“Наурыз” гэдэг үг анх персийн сурвалж бичигт манай эриний хоёрдугаар зуунд бичигджээ. Харин энэ баярыг тэмдэглэдэг явдал дэлхийн олон орны ахуй, зан заншилд манай цаг тооллын өмнөх, барагцаалбал 648-330 оны үеэс орж иржээ. Наурыз дорнодын ард түмэн ислам шашныг шүтэж эхлэхээс олон жилийн өмнө үүссэн учраас энэ баяр нь шашны зан үйл болон түүний урсгалуудаас ангид явж иржээ. Наурыз бол шинэ жилийн эх нь бөгөөд хаврын өдөр, шөнө тэнцсэн өдөртэй давхацдагаараа онцлогтой.