Т.Адьяатөмөр: Улаанбаатар хотын хэмжээнд 24 цагийн шүдний эмнэлэг байх нь иргэдэд маш их хэрэгтэй

-“Индранил” 24 цагийн шүдний эмнэлгийн үйл ажиллагаа хэзээнээс эхэлсэн бэ?

-Эмнэлгийн үйл ажиллагааны хувьд анх 2009 оноос эхлэлтэй ч хонож ажилладаг 24 цагийн зохион байгуулалтанд ороод нэг жил гаруй хугацаа өнгөрч байна. Улаанбаатар хотын хэмжээнд оройгоор ажилладаг шүдний эмнэлгүүд байдаг ч яг бүтэн 24 цагаар, шөнө ч гэсэн шүд нь өвдсөн хүнд яаралтай тусламж үйлчилгээ үзүүлдэг шүдний эмнэлэг байдаггүйг анзааран судалснаар ажлаа эхэлсэн. Ялангуяа ойр тойрны хүмүүс шөнө шүд өвдөөд нойргүй хонолоо, эмнэлэг хайгаад олдсонгүй, гэрээр яаж өвчин намдаах вэ гэх мэтээр ярихыг байнга сонсдог байлаа. Ингээд л бид Улаанбаатар хотын хэмжээнд 24 цагийн шүдний эмнэлэг байх нь иргэдэд маш их хэрэгтэй, бас олон хүнд буян, тус хүргэх юм байна гэж ойлгоод эмнэлгийн үйл ажиллагаагаа эхэлсэн дээ.

-Шүдний өвчлөлийн гол шалтгаан юу юм бол?

-Нэгдүгээрт эрүүл мэндийн боловсрол. Ер нь шүд, амны хөндийн гэлтгүй эрүүл мэндийн боловсрол манай дийлэнх иргэдийн хувьд маш чухал асуудал болоод байна. Тийм ч учраас бусад өвчний тархалт их байна. Ялангуяа шүдний өвчлөл Улаанбаатар хотын хүүхдүүдийн 90 гаруй хувийг эзэлж байдаг тухай судалгаа бий. Харин сүүлийн үед төр, хувийн хэвшлийнхний хичээл зүтгэлийн үр дүнд харьцангуй урьдчилан сэргийлэх үзлэг, оношилгоонд түлхүү анхаарснаар энэ тоо буурч байгаа байх. Гэхдээ энэ бол харамсалтай тоо шүү. Үндсэндээ аюулын харанга, чимээгүй тахал ч гэж хэлж болно. Шүдний өвчин нь дангаараа маш олон архаг хууч өвчний шалтгаан болж өгдөг учиртай. Хоёрдугаарт мэдээж шүдний арчилгаа, угаалт, чихэрлэг хоол хүнс идэх гэх мэт зүйлс орох байх. Гэхдээ шүдээ өвдсөний дараа биш эхлээд өвтгөхгүй байх нь хамгийн чухал, ингэх ч бүрэн боломжтой. Ердөө л урьдчилан сэргийлэлт, бас дахин урьдчилан сэргийлэлт гэж хэлмээр байна. Хэрвээ та хүсвэл манай эмнэлэг дээр ирээд шүд, амны хөндийн урьдчилан сэргийлэх үзлэгт үнэгүй хамрагдаад манай эмч нараас сайтар зөвлөгөө аваад яваарай гэж зөвлөе.

Шүдний өвчин нь дангаараа маш олон архаг хууч өвчний шалтгаан болж өгдөг учиртай.

-Танай эмнэлгийн онцлог давуу талууд юу вэ?

-Нэгдүгээрт цагийн хуваарь. Хотын хэмжээнд хонож ажилладаг 24 цагийн шүдний эмнэлэг гэдгээрээ манайх их онцлог. Хонож ажиллаж байгаагийн учир нь шүдний өвчний үед яаралтай тусламж үйлчилгээг цаг алдалгүй хүргэх зорилготой.

Хоёрдугаарт, манай эмнэлэгт шүдний үзлэг, оношилгоо, зөвлөгөө багцаараа үнэгүй байдаг. Манай иргэдийн дунд шүдний оношилгоо эмчилгээ их үнэтэй байдаг гэсэн ойлголтоос үүдэн тоохгүй явсаар шүдээ улам муутгадаг хандлага их. Иргэд шүдээ заавал өвдсөн хойно нь биш өвдөхөөс нь өмнө эмнэлэгт хандаж урьдчилан сэргийлэх арга хэмжээ авч чадвал эрүүл мэнд талаасаа ч, эдийн засгийн талаасаа ч маш их хэмнэлттэй тул бид нийгэмдээ илүү хариуцлагатай, ээлтэй байхыг хүссэн юм. Бусад эмчилгээний үнийн хувьд мөн харьцангуй дундаждаа орно. Бид боломжийн үнээр чанартай үйлчилгээ үзүүлэхийг хичээдэг. Эмчилгээ бол яг л стандартын дагуу явагдана.

Шүдний эмнэлгийн хамгийн чухал хэсэг болох ариутгал, халдвар хамгааллаа бид онцгой анхаарч ажилладаг.

Гуравдугаарт, бид үйлчлүүлэгчдээ ая тухтай байлгах талаар анхаарч ажиллахыг их эрмэлздэг. Манайхаар үйлчлүүлж буй бүх хүн эмчилгээ хийлгэнгээ намуухан аяз сонсож, хүүхдээ дагуулж ирсэн бол тоглоомын хэсэгт тоглуулаад, халуун кофе, цай ууж сэтгүүл гарчиглангаа интернетээр аялан дуртай телевизийн сериалаа үзэж болох зэргээр аль болох ая тухтай ЯГ Л ГЭРТЭЭ БАЙГАА ЮМ ШИГ сэтгэгдэл төрүүлэхийг хичээдэг.

Дөрөвдүгээрт бидний хувьд БАГ маань хамгийн чухал. Тэд маань сэтгэл ханамжтай, ажиллах урам зоригтой, ажилдаа дуртай, хөгжилтэй бас гэртээ байгаа юм шиг аз жаргалтай ажлаа хийх ёстой. Бид өөрсдийгөө их азтайд тооцдог. Яагаад гэвэл маш гоё баг, хамт олонтой. Энэ олон урам зоригтой, мэдлэг чадвартай, эерэг, шижигнэсэн залуусаараа үнэхээр их бахархдаг шүү. Хааяа жижиг сажиг ажлын стресс, үл ойлголцол байдаг л юм. Тэр асуудал биш ээ /инээв/. Нээрэн нэг жижигхээн нууц хэлэхэд, бид удахгүй эмнэлгийнхээ тагтыг тохижуулж ном уншаад хөгжим сонсонгоо кофе уугаад хөгжилдөөд суудаг булан болгох санаатай байгаа шүү. Хүсвэл уншигч таныг ч гэсэн манай тагтаар зочлоорой гэж урьж байна.

-Уншигчид маань танай эмнэлгийн үйлчилгээний үнэ хөлсний талаар сонирхож байж болох юм?

-Энд үнэ хөлсний тухай ярихаас өмнө эхлээд хамгийн чухал зүйл бол эмчилгээ, оношилгооны чанар, аюулгүй байдал, үйлчлүүлэгчдийн тав тух, сэтгэл ханамж. Бид энэ талдаа хичээнгүйлэн анхаарах ёстой гэж үздэг. Мэдээж түүндээ нийцсэн үнэ хөлс гэж бий. Манай эмнэлгийн хувьд Улаанбаатар хотын ихэнх эмнэлэгтэй адил дундаж л үнэтэй. Мөн манай урьдчилан сэргийлэх үзлэг, оношилгоо, зөвлөгөө багцаараа үнэгүй байдаг тухай дээр хэлсэн. Аливаа байгууллага үйл ажиллагаа явуулж байгаа бол нийгмийн хариуцлага гэж заавал байх ёстой гэж бид ойлгодог. “Хамгийн чухал зүйл бол иргэдэд эрүүл мэндийн боловсрол олгох, урьдчилан сэргийлэлт болоод байна. Тийм учраас заавал үнэтэй байх албагүй. Үзлэг хийлгэж оношлуулж, зөвлөгөө авчихаад үргэлжлүүлээд манайхаар үйлчлүүлэх, үгүй нь тухайн хүний шийдвэр. Заавал манайх гэлтгүй өөрийн хүссэн эмнэлгээрээ үйлчлүүлэх боломжтой. Хэдийгээр манайх үнийн хувьд дундаж байх зарчмыг барьдаг ч хэрэглэж буй материал, хэрэгслийн хувьд аль болох чанартай, баталгаатайг нь авахыг зорьдог.

Манай шүдний эмчилгээнд хэрэглэж байгаа материалуудын дийлэнх нь АНУ-ын “Ультра дент” брэндийн материал байдаг. Мэдээж урд, хойд хөрш болон Солонгос, Япон улсын материалууд ч бас бий.

Манай эмнэлэг одоогоор 24 хүний бүрэлдэхүүнтэй ажиллаж байна. 10 гаруй эмчтэй, мөн тооны орчим сувилагчтай. Түүний дээр ресепшин, үйлчлэгч, менежер нар нэмэгдэнэ. Мэдээж байгууллага бүхэнд хүрээгээ тэлэх, үйл ажиллагаагаа өргөжүүлэх бодлого, амбиц бий. Гэхдээ манай хувьд нэгдүгээрт Монгол Улсын хүн амын тодорхой хувийг ч гэсэн шүд, амны хөндийн өвчин зовлонгүй, эрүүл чийрэг байлгах, эрүүл чийрэг ирээдүйн Монгол хүнийг бий болгоход туслах туйлын зорилго байх учиртай. Уг нь хүмүүсийн эрүүл мэндийн боловсрол дээшилж шүдээ өвдөхөөс нь өмнө илүү анхаардаг болох юм бол бид эмнэлгээ заавал шөнөөр 24 цагаар ажиллуулах шаардлагагүй л дээ. Өндөр хөгжилтэй оронд бол ийм үйлчилгээ нэг их байдаггүй.

Германд ажилладаг нэг эмч 24 цагийн эмнэлэгтэй байх шаардлагагүй гэх шүүмж хэлж байсан. Гэвч манай нөхцөлд хараахан тийм боломж үгүй л байна. Харин алс  хэтдээ салбартаа шинээр нэвтэрч буй технологи, эмчилгээг Монголдоо нутагшуулахад илүү анхаарч ажиллана. Ерөнхийдөө шүдний салбарын хөгжил манай орны хувьд харьцангуй хурдтай хөгжиж байгаа нь хувийн эмнэлгүүдийн хөгжилтэй салшгүй холбоотой болов уу. Ер нь шүдний эмнэлгийг хүмүүс бизнес гэж их хардаг. Бидний ойлголтоор бол маш том буяны байгууллага юм шиг л санагддаг. Учир нь бидэнд үнэгүй, сайн дурын, буяны байдалтайгаар ажиллах маш олон тохиолдол гардаг. Гэлээ гээд бид шантардаггүй. Шантрах ч ёсгүй. Ажил олгогч бидний хувьд ч мөн 20 гаруй хүнийг ажлын байртай байлгаж, амьдрал ахуйд нь тус нэмэр болж буйдаа баяртай байдаг. Манайхан ч бас надтай санал нэг байгаа болов уу. Бид хамтраад хүний эрүүл мэндийн төлөө ажиллаж, инээмсэглүүлэн гаргаж байгаа минь сайхан үйл хэрэг гэж санан урам зориг авч ажилладаг хамт олон доо.

Ярилцсан Л.Ганзул

“Зиндаа” сэтгүүлийн 2018 оны №10/510 дугаарт нийтлэгдэв.