Д.Цогтбаатар: Сөүлээс ирэх шалтгаантай хүний тоо олон байна

Улсын Онцгой комиссын Шуурхай штабаас мэдээлэл хийж байна. хэвлэлийн хуралд Гадаад харилцааны сайд Д.Цогтбаатар, Онцгой байдлын ерөнхий газрын дарга, хурандаа Т.Бадрал, МИАТ-ийн гүйцэтгэх захирал Д.Баттөр нар оролцож байна. 

Гадаад харилцааны сайд Д.Цогтбаатар “Сүүлийн үед УОК, МИАТ компанитай хамтраад 10 орчим тусгай нислэг хийсэн. Берлин, Москва, Токио, Сөүл, Станбулаас иргэдээ тусгай нислэгээр авчирлаа.

Зарим хүмүүст эргэлзээ төрүүлж байх шиг байна. Онгоцонд багтахгүй байгаагаас иргэд шүүмжлэл өрнүүлж байгаа. УОК-оос гаргасан таван үзүүлэлтийн дагуу иргэдээ тусгай нислэгээр авчирч байна. Эрүүл мэндийн шалтгаантай, өвчтэй, жирэмсэн хүмүүсийг авчирна.   

Сөүлд ийм шалтгаантай маш олон иргэн байдаг. Манай улсаас БНСУ-д эмчлүүлэхээр иргэд олноороо очдог. Гэтэл бусад орнуудаас ирэх иргэд харьцангуй гайгүй байгаа.

Сөүлийн нислэгийг цахимаар бүртгэсэн. Иргэд Сөүлийн нисэх буудал дээр олноороо ирж бүртгүүлэх нь эрсдэлтэй байгаа. Сөүл - Улаанбаатарын эхний нислэгээс хоёр иргэн халдвартай нь тогтоогдсон шүү дээ. Тиймээс эрсдэл үүсгэхгүй гэдэг үүднээс цахимаар бүртгэсэн. Сөүл – Улаанбаатарын эхний нислэгийн бүртгэл /2020.04.04-ний нислэг/ дээр 500 хүн бүтгүүлсэн. Онгоц 250 хүний суудалтай учраас суудлын тоогоороо хүнээ авчирсан. Дараагийн нислэгээр өмнө бүртгүүлсэн 250 хүнээ авчирсан. Гэтэл дээрх бүртгүүлсэн 500 хүнд багтаагүй хүмүүс гомдол гаргасан.

Харин Берлин, Москва, Станбул гээд бусад орнуудаас ирэх иргэд цөөн байгаа. Тусгай нислэгээр 1800 гаруй иргэнээ авсан байна. Хөл хорио тогтоосноос хойш агаараар, төмөр замаар, автомашинаас гадаадаас 6000 гаруй иргэнээ авсан” гэлээ.