Нийслэлийн шүүхүүд “ГАДНЫН НӨЛӨӨ”-нд автах эрсдэлтэй тулгарлаа

Нийслэлийн Эрүүгийн хэргийн давж заалдах шатны шүүгч Т.Өсөхбаяр өөрийгөө тус шүүхийн Ерөнхий шүүгчид нэр дэвшүүлээд байгаа тухай өмнө нь бид мэдээлсэн.

Тэрбээр, шүүхээс дөрвөн жилийн хорих ял аваад байгаа өмгөөлөгч Б.Баасанцогтын зохион байгуулсан гэх “нууц” уулзалтад оролцож, лифтний бичлэгт орсон байдаг ба түүний энэ үйлдлийг шүүгчийн ёс зүйн хариуцлага алдсан гэж үзэн, Шүүхийн сахилгын хорооноос шийтгэл оноогоод буй.

Ийнхүү хариуцлага алдаж, сахилгын арга хэмжээ авахуулсан тэрбээр өөрийгөө Нийслэлийн Эрүүгийн хэргийн давж заалдах шатны шүүхийн ерөнхий шүүгчийн албан тушаалд тэнцэнэ гэж үзжээ.

Харин олон нийтийн үзэл бодол огт өөр байгаа бөгөөд Т.Өсөхбаяр ерөнхий шүүгч болсноор шүүхийн хараат бус байдал алдагдаж, Монгол улсын ерөнхийлөгч асан Ц.Элбэгдорж нарын нөлөөлөл Нийслэлийн Эрүүгийн хэргийн давж заалдах шатны шүүхэд тогтох аюултай хэмээн болгоомжилж байна.

Учир нь шүүгч Т.Өсөхбаярын оролцож, шийдвэрлэсэн хэргүүд эцэст нь ерөнхийлөгч асан Ц.Элбэгдорж, Улсын ерөнхий прокурор асан Д.Дорлигжав, нартай холбогддог гэх. 

КЭЙС 1: С.ЭРДЭНИЙН ХЭРГИЙГ ХЭРЭГСЭХГҮЙ БОЛГОСНООР АЛБАН ТУШААЛ ДЭВШИВ

2009 оны нэгдүгээр сард Авлигатай тэмцэх газрын Мөрдөн шалгах хэлтсээс тухайн үеийн Нийгмийн даатгалын ерөнхий газрын дарга С.Эрдэнэд эрүүгийн 20747343  тоот хэрэг үүсгэж шалгасан байдаг. Энэ хэргийг Баянгол дүүргийн шүүхэд хэлэлцэж 6 жилийн ял оноосон боловч Нийслэлийн шүүхээс хэргийг тус шүүх рүү буцаасан байдаг.

Улмаар Баянгол дүүргийн шүүх энэ хэргийг дахин хэлэлцээд хэрэгсэхгүй болгож шийдвэрлэж байжээ.

Хэргийг хэрэгсэхгүй болгосон шүүх бүрэлдэхүүнд Т.Өсөхбаяр нь илтгэгч шүүгчээр оролцсон бөгөөд тэрбээр энэ хурлын дараачаас Баянгол дүүргийн шүүхийн Ерөнхий шүүгч, Нийслэлийн Эрүүгийн хэргийн давж заалдах шатны шүүгчээр тус тус дэвшин томилогдож байсан байна.

Энэ хэрэгт тухайн үеийн ерөнхийлөгч Ц.Элбэгдоржийг шууд нөлөөлсөн гэдэг бөгөөд үйл явдал дууссаны дараа хуралд улсын яллагчаар оролцсон н.Бадрал, шүүгч Т.Өсөхбаяр нар С.Эрдэнэтэй уулзахаар Солонгосыг зорьсон гэдэг мэдээлэл байдаг.

КЭЙС 2: АВГА АХ Б.ЧУЛУУНБААТАРЫН "ЗАХИАЛГААР" АНГЛИЙН ИРГЭНД ЯЛ ОНООВ

“Моннис” группийн захирал Б.Чулуунбаатар нь өмнө нь эрүүгийн хэрэгт холбогдон шалгагдаж байх үедээ Улсын ерөнхий прокурор асан Д.Дорлигжавд их хэмжээний авлига өгч хэргээ хаалгасан гэх мэдээлэл тухайн үед хэвлэлээр гарч байв. Тэд энэ хэргээр холбогдож, дотно нөхөрлөх болсон гэгддэг ба албан тушаалаа ашиглан гадаадын иргэнд хэрэг үүсгэж, шүүхээс хорих ял оноож байжээ.

Тодруулбал, “Моннис” группийн захирал Б.Чулуунбаатар нь Пакистан гаралтай Английн иргэн Моншиг шүүхэд дуудуулж, уг хуралд шүүгчээр Т.Өсөхбаяр оролцож, ял оноожээ.

“Моннис”-ын Б.Чулуунбаатар нь Т.Өсөхбаярын авга ах бөгөөд өөрсдийн холбоо хамаарлыг ашиглаж ийнхүү хилс хэргээр ял оноосон байж болзошгүй аж. Учир нь Английн иргэн Монши монголын шүүхээс хилсээр ял оноосон гэж үзээд олон улсын шүүхэд зарга мэдүүлээд байгаа юм байна.

Зарим эх сурвалжийн мэдээлж байгаагаар гадаадын хөрөнгө оруулагчдыг залилсан, хилсээр ял тулгаж, дээрэмдсэн гэх 57 хэргийн дунд Т.Өсөхбаярын шийдвэрлэсэн хэд хэдэн хэрэг багтсан гэх бөгөөд сэргээн шалгагдахаар болоод байгаа аж.

Иймд, “Хонгил”-ын гэгдэх шүүгч Т.Өсөхбаяр Нийслэлийн Эрүүгийн хэргийн давж заалдах шатны шүүхийн Ерөнхий шүүгч болвол нийслэлийн анхан болон давж заалдах шатны шүүхүүдийн хараат бус байдал алдагдаж, гаднын фракцын нөлөөлөл тогтоно гэх болгоомжлол хуулийнхны хүрээнд яригдаж байна.