Х.Нямбаатар: Би хүн хэлмэгдүүлж, шоронд суулгаж чадахгүй

Хууль зүй, дотоод хэргийн сайд Х.Нямбаатар болон АТГ, ЦЕГ, шүүх, прокурорын байгууллагын удирдлагууд хамтран "нүүрсний хулгай"-тай холбоотойгоор жагсагчдын тавьсан шаардлагын дагуу Төрийн ордонд мэдээлэл хийж байна. 

Энэ үеэр Хууль зүй, дотоод хэргийн сайд Х.Нямбаатар "Зарим жагсагчид шууд нэрийг нь зарла гээд байгаа юм. Би мэдэхгүй байна. Харин хэвлэлээр явж байгаа нэрсийг нь мэдэж байна. Аль дээр "Ажнай" Д.Бат-Эрдэнэ, А.Адъяасүрэн нартай холбоотой хэрэг яригдаж л байсан. Би нийт 21 хэрэг дээр хэн, хэн шалгагдаж байгааг мэдэхгүй байна. Ерөнхий сайд таван чиглэлд шалгалтаа эрчимжүүл гэдгийг хэлсэн. Түүнээс шууд хүн заагаад гэм буруутай гээд хүн яллаж болохгүй.

Гадаа байгаа хүмүүст тийм ойлголт өгөөд, бухимдуулаад байна шүү дээ. Шууд таамгаар энэ, энэ хүн гээд буудаж болохгүй биз дээ.

Тиймээс энэ хүмүүсийн ажлыг эрчимжүүлье, тоог нь нэмж өгье, машин тэргийг нь гаргаж өгөхөөр сууж байна. Би сайдаар ажиллаж байх хугацаандаа хэн нэгнийг хэлмэгдүүлж, шоронд суулгаж чадахгүй" гэлээ.
 

Мөр тэрбээр "Засгийн газраас шаардлагатай мэдээллийг гаргаж өгнө. БНХАУ болон бусад улсаас хэрэг шалгахад шаардлагатай мэдээ, мэдээллийг гаргахад Засгийн газар анхаарч ажиллана. Хөдөө, орон нутгаас эрүүгийн хэргийн мөрдөгчдийг нэмж, хэргийг шалгах хэрэгтэй байна. Бүгдээрээ маргаашнаас эхэлж ажлаа эрчимжүүлье. Бид мөрдөн шалгах ажиллагааны дотоод асуудалд оролцохгүй. Ерөнхий сайд дөрөв, таван чиглэлд мөрдөн шалгах ажиллагаагаа явуулах хэрэгтэй гэж хэлсэн. Нэгт, нүүрсний гэрээ. Хоёрт, их хэмжээний худалдан авалт. Гуравт, тээвэрлэлт зэрэг асуудлыг гадаа жагсаж байгаа иргэдийн таалалд нийцүүлж, хуулийн хүрээнд хурдан шалгаж өгөхийг хүсэж байгаа юм. Нүүрсний хэрэг дээр дөрвөн эрүүгийн хэрэг үүсгэн шалгаж байгаа гэж сонссон" хэмээн тодотголоо.