Баянхонгорчууд С.Чинзоригийг орон нутгийн аж байдалтай ойр нэр дэвшигч гэж тодорхойллоо

УИХ-ын нэгдүгээр тойрог буюу Хангайн бүсэд МАН-аас нэр дэвшигчид Баянхонгор аймгийн 12 суманд ажиллаж иргэд сонгогчидтой 13 удаагийн уулзалт хийгээд байна. Уулзалтын үеэр УИХ-ын ээлжит сонгуульд нэр дэвшиж байгаа МАН-ын нэр дэвшигчдийг Баянхонгорчууд багаар нь дэмжихээ илэрхийлжээ.

МАН-аас УИХ-ын ес дэх удаагийн сонгуульд дэвшүүлсэн мөрийн хөтөлбөрийг сурталчлан, ирэх дөрвөн жилд ард түмэнтэйгээ хамт улс орноо хөгжүүлэх төлөвлөгөө, хийж хэрэгжүүлэх ажлынхаа талаар нэр дэвшигчид Хонгор нутгийн иргэд сонгогчдод танилцуулаад байна. Хонгор нутгийн түмэн олон МАН-аас Хангайн бүсэд нэр дэвшүүлсэн 9 эрхмийг багаар нь, багцаар нь сонгож Л.Оюун-Эрдэнийн тэргүүлсэн Засгийн газрын эхлүүлсэн шударга ёсны төлөө системийн авлигатай хийсэн тэмцэл, 5Ш ажиллагааг үр дүнд хүргэхэд сонгуульд саналаа өгч хувь нэмрээ оруулна гэдгээ хэлж байлаа.

Баянхонгорчуудын хувьд МАН-ын нэр дэвшигчдийг дэмжиж байгаа гол шалтгаан нь төрд бодлого тодорхойлох чадварт хэдийн бэлтгэгдсэн туршлагатнууд байгаад олзуурхаж хүлээн авч байна. Тухайлбал нэр дэвшигч С.Чинзориг хөдөлмөр нийгмийн чиглэлээр мэргэшиж орон нутгаас ажлын гараагаа эхэлсэн хөдөөгийн амьдралтай ойр түшээдийн нэг гэж Баянхонгорчууд тодорхойлж байгаа юм. Нэг ёсондоо төрийн албаны анхан шатнаас эхэлж улс төрийн гал тогоонд чанагдсан туршлага нь бодлого тодорхойлох чадварыг бэхжүүлж алив хууль, журмын боловсруулалтад олон талын дүгнэлт хийх, салбар, салбарын онцлогт нь нийцүүлэх чиглэлд мэргэшсэн гэж Хонгор нутгийн иргэд дүгнэж байна.

Засгийн газар энэ оныг “Бүсчилсэн хөгжлийг дэмжих жил” болгон зарлаж улсын төсвийн хөрөнгө оруулалтын 80 шахам хувийг хөдөөг хөгжүүлэх, тулгамдсан асуудлыг нь шийдвэрлэхэд зориулан хуваарилсан бөгөөд энэ бүгдийн үр дүнд иргэд орон нутагтаа, сумандаа сайхан амьдрах боломжийг бүрдүүлэхэд анхаарч байгаа юм.

МАН Бүсчилсэн хөгжлийн үзэл баримтлалыг шинэчлэн, бодитоор хэрэгжүүлэхдээ эдийн засгийн тэргүүлэх чиглэлүүдэд тулгуурлаж хөрөнгө оруулалтыг төлөвлөснөөр орон нутагт эдийн засаг тэлэх суурь бий болох юм. Энэ бүхний төлөө, илүү сайхан амьдарч, эх дэлхийн улс орнуудтай хөл нийлүүлэн алхахын төлөө иргэд МАН-ыг дэмжих сонголтыг хийнэ гэдгээ хэлж хангайн бүсэд нэр дэвшигчдэд хариуцлага, хүндлэлийг хамтад нь өгч байгаагаа илэрхийлж байлаа.