Зуны улиралд хүүхэд багачууд “гэр цэцэрлэг”-т хамрагдах боломжтой

Япон улсын буцалтгүй тусламжийн хүрээнд Азийн хөгжлийн банк, БСШУЯ-наас хэрэгжүүлж буй “Хөдөөгийн нүүдэлчин болон шилжин суурьшсан иргэдийн хүүхдүүдэд сургуулийн өмнөх боловсрол эзэмшүүлэх JFPR” төсөл хэрэгжээд байна. Энэхүү төслийн хүрээнд Баянзүрх дүүргийн 17, 21, 28 дугаар хороодод шинэ “гэр цэцэрлэг”-үүд байгуулсан бөгөөд зургадугаар сарын сүүлчээр үйл ажиллагаагаа явуулж эхэллээ. Хороо тус бүрт хоёр гэр барьж тохижуулсан бөгөөд нэг гэрийг нь хоолны гэрийн зориулалтаар ашиглаж, нөгөө гэрт нь хүүхдүүдээ хүлээн авч байгаа аж. “Гэр цэцэрлэг” бүрт 25 хүүхэд хичээллэж өдрийн цагаа үеийн багачуудтайгаа өнгөрүүлж байна. Зуны өдрүүдэд сургууль, цэцэрлэгүүд амардаг учраас тухайн дүүргийн харьяа цэцэрлэгийн багш, тогооч нар ажиллаж байгаа юм. Мөн манаач, үйлчилгээний ажилд тухайн хорооны ажилгүй иргэдийг хамруулжээ. Энэхүү цэцэрлэг нь бусад цэцэрлэгийн адил өглөөний 08.00 цагаас оройны 17.00 цаг хүртэл ажиллах бөгөөд цаашдаа ч тогтвор суурьшилтай үйл ажиллагаа явуулахаар төлөвлөөд байгаа юм байна.       

Д.Шинээ