Түшээгээсээ эхлээд түшмэл нь хүртэл алдаатай бичих юм

Монгол Улс НҮБ-д элсч бүх нийтээрээ бичиг үсэгт тайлагдсан орны тоонд орж явсан цаг саяхан. Гэвч өнөөдөр зөв бичгийн дүрэм байхгүйтэй адилхан боллоо. Цахим ертөнц хөгжихийн хэрээр алдаатай бичих үг, өгүүлбэрийн утгын алдаа тоогоо алдав. Бичиг үсэгт  мэдэхгүй хүний тоо ч нэмэгджээ. Зөвхөн Завхан аймагт гэхэд бичиг үсэгт тайлагдаагүй 400 гаруй хүн байна гээд бодохоор даяаршсан нийгэмд эмгэнэлтэй  сонсогдоно. Бичиг үсэгтэй нь алдаатай бичнэ. Бид буруу ярьж зөв ойлгодог гэж нэгийгээ хөөргөдөг байсан бол одоо буруу бичиж зөв уншдаг хэмээн онгироох боллоо. Эрдэмтэн судлаачид, их, дээд сургуулийн багш нар хүртэл заавал зөв бичих 700 үг  гарахаас өмнө өөрсдийнхөөрөө дүрэм зохиодог байлаа. Өөрсдөө буруу биччихээд үр хүүхдээ зөв бичсэнгүй гэж зэмлэх үү. Төрийн тэргүүний зөвлөх, УИХ-ын гишүүн асан, Төрийн албан хаагч нь хүртэл  тушаал шийдвэр, нэрийн хуудас, өргөдөл бичихдээ үг үсгийн алдаа гаргана.  Яах ёстой вэ. Энэ хэрээр монгол хэлэнд маань аюул занал учирсаар байх уу.  

“Өрөгдөл” гэж бичдэг Арвин

УИХ-ын гишүүнээр Хэнтий аймгаас хоёр удаа сонгогдсон Д.Арвин. 2012 оны сонгуулиар нийслэлийн Баянзүрх дүүрэгт МАН-аас одоогийн ХААХҮ-ийн сайд Батзоригтой дахин санал хураалтаар өрсөлдөж бараг луйвраар гарсан гэлцдэг. Парламентад орж,  УИХ-ын гишүүний тангараг өргөнгүүтээ  нэрийг нь дэвшүүлсэн намынхаа биш АН-ын жигүүрт суусан. Удалгүй  олонхи биш олуулаа болсон намыг дагаж, МАН-аас гарах өргөдлөө өгсөн юм. Харин өргөдөл бичихдээ өөрийгөө хэр  зэрэг боловсорсон бэ гэдгийг олон нийтэд харуулав.  Өргөдөл гэхийг “ӨРӨГДӨЛ” хэмээн хэдэнтээ бичсэн байдаг юм.

Төрийн албаны алдаатай бичигч Отгонбаяр

УИХ-ын гишүүний Арвины дараа нэгэн алдартай алдаатай бичигч Төрийн албанаас тодорсон нь Нийслэлийн Засаг даргынТамгын газрын дарга М.Отгонбаяр юм. Төрийн албан байгууллагын дарга түүний "Утааны эсрэг аав, ээжүүд" Төрийн бус байгууллагад өгсөн хариу албан бичигт утгын болоод үсгийн алдаа гурвантаа давтагдсан байв. Гурван өгүүлбэрийг “байна” гэж төгсгөөд, чимэг болгосон гэмээр “2016 оны 03 дугаар сарын 18-ны өдрийн” гэж он алдаж бичсэн, “давхцаж”гэхийг давцаж,  “боломжгүй” гэхийг боложгүй  гэж үсэг орхисон  алдаанууд гаргав. Туслах, нарийн бичгийн боловсруулсан албан бичиг холбогдох мэргэжилтнээр хянагдаж, дарга гарын үсэг зурах учиртай. Гэвч төрийн албан хаагчид ажилдаа хариуцлагагүй ханддаг, бичиг үсгийн боловсрол тааруу байна гэж дүгнэхэд хүрч байна. Нийслэлийн удирдлага нь алдаатай бичиг цохож суухад, дүүргүүдийн мэргэжилтнүүд нь яадаг бол гэсэн хардлага төрнө. Нийт төрийн албан хаагчдаа муухай харагдуулсан. Хотын дарга Засаг даргын Тамгын газрын даргадаа хариуцлага тооцоогүй.

Нэрийн хуудас нь алдаатай зөвлөх асан  Батбаяр

Дараагийнх нь УИХ-ын гишүүнээр дөрвөн жил Сонгинохайрханчуудыг төлөөлж суусан  Кёкүшюзан Батбаяр. Ерөнхий сайд Алтанхуягийн зөвлөхөөр ажилласан ч “Ерөнхий сайд ядарчихна” гээд зөвлөдөггүй байсан зөвлөх. Харин Ерөнхийлөгч Х.Баттулгын орон тооны бус зөвлөхөөр хэдэн сар ажиллав. Японы сүмо бөхийн маргаанд оролцоод байгаа ч юм шиг, шийдвэр гаргах гээд байгаа ч юм шиг аягласан. Нэрийнхээ хуудсыг алдаатай бичээд  япон  түншүүддээ тараачихсан байж ч магадгүй боллоо.  “Монгол Улсын Ерөнхийлөгчийн Тамгийн газар”  гэж нэрийн хуудсан дээрээ тодоос тод биччихсэн Батбаяр өчигдөрхөн Ерөнхийлөгчийн  орон тооны бус зөвлөхөөс албан ёсоор чөлөөлөгдсөн. Шалтгаан нь тодорхойгүй. Ийнхүү төрийн өндөр албан тушаалтнууд, шийдвэр гаргагчид албан бичгээ алдаатай гаргаад эхлэхээр жирийн иргэд ямар байх нь тодорхой.

А.Эрдэнэ

www.zindaa.mn