Дараачийнх нь “Да хүрээ” зах

Нэлээд хэдэн жилийн өмнөөс яригдаж эхэлсэн “нүүлгэлт”-ийн ажил өнөөдрөөс эрчимжив бололтой. Улаанбаатар хотын 2020 хүртэлх хөгжлийн ерөнхий төлөвлөгөөний дагуу 2015 онд нэгэн шинэ авто зах байгуулсан ч одоог хүртэл ханхай, назгай хэвээр байгаа.  “Авто худалдааны цогцолбор” нэртэй тус газрын үйл ажиллагаа эхлээд гурав дахь оныхоо нүүрийг үзэж байгаа. Гэвч хотын төвд худалдаа эрхлэгчид ашиг орлого, ашигтай байршил зэргээ бодон өнөөдрийг хүртэл тийш тэр бүр зүглээгүй билээ. Тэгвэл өнөөдрөөс тийш нүүлгэх ажлын явцыг эрчимжүүлж, албадан нүүлгэлтийг Улаанбаатар төмөр зам дахь авто зогсоолоос эхлүүллээ.

 Иргэдийн эсэргүүцэл цагдаагийн албан хаагчдийн хамгаалалтын дор нүүлгэн шилжүүлэлт сүр дуулиантай болж өнгөрөв. Харин дараагийн нүүлгэлт мэдээж “Да хүрээ”-гээр үргэлжлэх болов уу... 10 000 гаруй хүнийг ажлын байраар хангадаг гэх тус захыг 2016 онд нүүлгэх тухай яригдаж байсан ч түр хойшлуулсан. Нэгэнт л нүүлгээд эхэлчихсэн учир тус захыг байрнаас нь хөдөлгөх цаг болсон. Тухайн газар оршин сууж байгаа иргэдийн эрүүл мэнд, агаар хөрсний бохирдолд голлох нөлөө үзүүлж буй тус газрыг хамгийн түрүүнд нүүлгэх ёстой гэж иргэд үздэг. Тус захыг тойроод өч төчнөөн авто засвар, угаалга, дугуй засварын цэгүүд байршдаг. Нарийвчилбал 60 орчим жижиг үйлчилгээний цэг бий гэсэн тооцоо байна.

 Орчны бохирдлын үүр, уурхай гэсэн үг л дээ. Өвлийн цагт “Да хүрээ” орчмоор явахад ямар байдгийг хэлүүлэлтгүй мэдэх биз. Асаалттай голдуу машин тэрэг, газраар нэг асгарсан тос тортог, байгалийн цас мөснөөс илүүтэйгээр хүний шээсэн ялгадас нь халтиргаа гулгаа болж хөлдсөн харагддаг. Энэ нь хүний эрүүл мэндэд ноцтой хохирол учруулж буй нүдэнд харагдах жишээ. Өөр нэг хохиролтой зүйл бол хүүхдийн биеэс хар тугалга илэрч байгаа тухай асуудал юм. Энэ өвчний шинж тэмдэг тус газрын оршин суугчдаас давамгай илэрч байгаа тухай мэдээлэл бий. Иймээс иргэдийнхээ эрүүл мэндийг аль аль талдаа бодолцох нь чухал юм. Мэдээж тус захыг нүүлгэснээр авто худалдаа эрхлэгчид хийгээд, дагаад амьжиргаагаа залгуулж буй жижиг худалдаа эрхлэгчдэд хохиролтой нь ойлгомжтой.

 Гэхдээ үйл ажиллагааг нь зогсоож, татан буулгаагүй болохоор нөхцөл байдалтай зохицохоос өөр аргагүй. Нийслэлийн хэмжээнд одоогоор 100 орчим иргэн, ААН авто болон сэлбэгийн худалдаа эрхэлж буй. Тэдгээрийг бүгдийг нь нүүлгэн шилжүүлснээр хотын утаа, замын түгжрээний багагүй хэсэг арилах талтай. Тиймийн тулд томоохон авто худалдааны захуудыг албадан нүүлгэсэн тохиолдолд тойрон хүрээлж байсан жижиг үйлчилгээний газрууд дагаад нүүх нь гарцаагүй. Өнөөдрийн үймээн шуугиан ямартай ч бусад авто худалдаа үйлчилгээний газруудад ямар нэг хэмжээгээр доргилт өгч буй. Харин “Да хүрээ”, “Мануул трэйвел”, “Дөрвөн өлзий” зэрэг зах нь Авто худалдааны цогцолборт төвлөрөх үйл ажиллагааг эсэргүүцэн шүүхийн байгууллагад хандсан бөгөөд энэ асуудал шүүхийн шатанд үргэлжилж байгаа... гэсэн мэдээ байна. Өнөөдөр биш юмаа гэхэд дараа заавал “Да хүрээ” тэргүүтэй бусад захыг хотоос гаргахаас өөр гарцгүй билээ.

Л.Ганзул

www.zindaa.mn