Алтанширээд Нефтийн үйлдвэр барих 5 шалтгаан

Олон жилийн турш яригдсан Нефть боловсруулах үйлдвэрийн ажил гараанаас нэгэнт гарсан. Үе үеийн эрх баригчид нефть боловсруулах үйлдвэр байгуулна хэмээн сонгогч олноо ярьдаг төдийгүй, шав тавиад авсан нь цөөн бус. Тиймээс иргэдийн итгэл алдарчихсан энэ цаг үед Дорноговь аймгийн Алтанширээ сумын нутагт Газрын тос нэрэх үйлдвэр байгуулахаар зураг төслөө хийгээд төсөв хөрөнгөө ч шийдсэн учраас гараанаас нэгэнт гарсан хэмээн хэлээд байгаа юм.

Тодотговол, Газрын тос боловсруулах үйлдвэрийн нарийвчилсан ТЭЗҮ-г Энэтхэгийн төрийн өмчит “EIL” гэдэг компани хийгээд дуусах шатандаа байна. ТЭЗҮ-ээр үйлдвэрийн бүхий л тоо баримт тодорхой болно. Хэдийгээр төсөв тоо тодорхой бус ч гэсэн эхний ээлжийн хөрөнгөний асуудал шийдэгдсэн гэхээр энэ ажлын хувьд нэгэнт хийгдэх нь тодорхой байна. Нөгөө талаас Энэтхэгийн тал энэ зээлийг өгч байгаа учраас давуу эрхтэйгээр өөрийн орны “PMC” компанийг сонгох санал оруулсан гээд ажил тодорхой болсон шалтгаан олон бий.

Харин Дорноговь аймгийн Алтанширээ суманд Газрын тосны үйлдвэр байгуулах болсонтой холбогдуулан “Алтанширээ суманд газрын тосны нөөц илэрц байхгүй” гэсэн мэдээлэл явж байгаа нь иргэдийг ахин төөрөгдүүлэх шалтгаан болоод байна. Тус нутагт Газрын тосны үйлдвэр байгуулах зураг төсөл нь нөөц түшиглээгүй бусад холбогдох зүйлээ түшиглэсэн гэдгийг тодотгож хэлэх нь зөв. Тэгэхээр Алтанширээ суманд Газрын тосны үйлдвэр барих болсон тодорхой шалтгааныг тайлбарлах нь зөв гэж бодлоо.

Нэгдүгээрт

Алтанширээ сум нь зам харгуй, эрчим хүч  гээд бүхий л дэд бүтэцдээ ойр дөхөм юм. Томоохон хэмжээний үйлдвэрт тавигдах эхний шаардлага бол эрчим хүч бусад дэд бүтэц байдаг.

Хоёрдугаарт

Өнөөдөртөө бусдын төөрөгдүүлэн ярьж байгаа шиг тус сумын нутаг нөөц байхгүй байж болно. Илэрц байж ч болно. Одоогоор хайгуул хийгээд илрүүлчихсэн зүйл байхгүй нь үнэн. Гэхдээ энэ нь Дорнодын 19, 21 дүгээр талбайгаас нефтийн түүхий эдээ татахаар тооцоолсны дагуу зураг төсөл орж ирж байгаа хэрэг. Тодотговол, Тамсаг булагаас. Мөнхүү Дорноговь аймгийн төвөөс 40 орчим километрт Зүүнбаянгийн нефтийн нөөц бий бөгөөд өдгөө хятадууд олборлон урагшаа гаргаж буй. Энд бүр 1950 оны үед ашиглаж байсан үйлдвэрийн суурь ч бий.

Гуравдугаарт

Хүнд төрлийн үйлдвэрт орох Нефтийн үйлдвэр байгуулахад гол хэрэглэгдэхүүн бол ус. Тэгэхээр Газрын тосны үйлдвэр байгуулах газарт усны арвин их нөөц бий.

Дөрөвдүгээрт

Нефть нэрэх үйлдвэрийн амин чухал нэг зүйл бол төмөр зам. Тэгвэл өдгөө үйлдвэр барихаар товлоод буй газраас төмөр зам татахад маш бага хөрөнгө зарцуулж Сайншандтай төмөр замаар холбогдох боломжтой юм.

Тавдугаарт

Сайншанд Хүнд үйлдвэрийн парк гэсэн нэг үлгэрийн төсөл цаасан дээр ч бүрэн буугаагүй байгаа болов уу. Нөгөө талаас үүнийг түшиглэсэн Даланзадгад-Сайншанд-Чойбалсан гэсэн маршрутын төмөр замын зураг төсөл байгаад сүүлдээ замхарсан. Далан шороо болоод дууссан ч гэдэг. Энэ бүх үлгэр хэзээ нэгэн цагт биелэлээ олох өдөр байж таарна. Тэгэхээр үүнийг түшиглэсэн ирээдүйн зураг ч энд байхыг үгүйсгэх аргагүй.

С.Ууганбаяр

www.zindaa.mn