Ерөнхийлөгч Х.Баттулга суулт зарласан багш нартай уулзлаа

Багш нарын ажил хаялтын зургаа дахь өдөр талбай дээр суулт зарласнаар үргэлжилж байна. Суултыг Боловсрол, шинжлэх ухааны салбарын үйлдвэрчний эвлэлийн холбооноос зохион байгуулж байгаа юм.

Тэд энэ сарын 1-нээс цалинг 15 хувиар, 2019 оноос 50 хувиар нэмэгдүүлэх, мөн нэг удаагийн тэтгэмж болох 300,000 төгрөгийг аравдугаар сарын 1-ний дотор олгохыг шаардан ажил хаялтаа ийн суулт болгон өргөжүүлээд байна. Суулт 13:00 цаг хүртэл үргэлжилсэн бөгөөд багш, шинжлэх ухааны салбарынхан хуваагдан Сангийн яам, Хөдөлмөрийн яамны гадаа очин эсэргүүцлээ илэрхийллээ. Суулт зохион байгуулагчдын зүгээс "Өнөөдрийн байдлаар улсын хэмжээнд Ерөнхий боловсролын 113 сургууль, 13 цэцэрлэг  ажил хаялтад нэгдээд байна. Бидний шаардлагыг хүлээж авахгүй тохиолдолд цаашид ажил хаялтын хүрээгээ тэлэх болно" хэмээн мэдэгдлээ.

Багш нарын талбай дээрх суултын үеэр Монгол Улсын Ерөнхийлөгч Х.Баттулга хүрэлцэн ирсэн бөгөөд уулзалтын талаарх яриаг дэлгэрэнгүй хүргэе.

Ерөнхийлөгч Х.Баттулга: Тавдугаар сарын 08-нд нэг бичиг өгсөн. Хууль санаачилж өгөөчэй гэсэн байгаа юм. Би бас хөдөөгүүр явж байгаад ирлээ л дээ. Та нар дундаж цалингаа хэд гээд байлаа?

Суулт зарлаж буй багш: Сувилагч, эмч, багш нар гэлтгүй гар дээр авч байгаа дундаж цалин 300-400 мянга шүү дээ. Тэгээд татвар, нийгмийн даатгалаа төлөөд, зээл, лийзингээ төлөөд доод тал нь 3-30 мянган төгрөг л гар дээрээ авч байгаа.

Ерөнхийлөгч Х.Баттулга: Доод тал нь сая төгрөг авах ёстой. Тэр байтугай эмч, багш нарыг орон сууцаар нь хангаж, банкны хүүгүй зээлд хамруул гэж ярьдаг. Аймаг, сумдын эмч багш нар алслагдах тусмаа цалин нь өндөр байх шаардлагатай гэж ярьж явдаг учир санал нэг байна. Нөгөө уул уурхайн баялаг чинь гучин хэдэн гэр бүлийн төлөө үйлчлээд байна шүү дээ. Энэ задрахгүйгээр та нарын юмыг яагаад ч чадахгүй. Сангийн сайд нь хэн бэ, Хүрэлбаатар. Энэ уул уурхайн гучин гэр бүлийг хамгаалдаг хүнийг бүх юман дээр нь аваачаад тавьчихсан. Төсөв байхгүй ээ гээд л. Тэгээд маргааш 13 цагт төлөөлөлтэй нь уулзъя. Нэлээн ярьж байснаа тэр 300,000 төгрөг тараах дээр нам болчихсон уу?

Суулт зарлаж буй багш: Тийм. Валютын сантай бид гурван талт хэлэлцээр хийгээд 2018 оны гуравдугаар сард цалинг чинь нэмье гэж Чинзориг сайд гуйсаар байгаад 2017 оны 11 дүгээр сард хийж байсан тэмцлийг зогсоосон. Одоо бид тэр хэлэлцээрийнхээ үр дүнг шаардаад сууж байгаа. Цалингаа тавиас доошгүй хувиар нэмэгдүүлэхээс нааш бид энэ суултыг нэг ч алхам ухраахгүй гэсэн байр суурьтай байгаа.

Ерөнхийлөгч Х.Баттулга: Зөв, зөв. Дэмжиж ажиллана аа. Ийм байж болохгүй. Ийм баян орон хөдөлмөрчдөдөө үйлчилдэг, яг фронтод нүүр тулж ажилладаг хүмүүсийг ийм байдалтай байлгаж болохгүй гэдэг дээр санал нэг байна.

Ийн Монгол Улсын Ерөнхийлөгч Х.Баттулга багш нарын ажил хаялтыг дэмжиж буйгаа илэрхийллээ. Түүнийхээр Сангийн сайдаараа Ч.Хүрэлбаатарыг томилсноос цалин нэмж болохгүй байгаа хэмээн багш нарт тайлбарлав. Харин Сангийн сайд Ч.Хүрэлбаатар багш нарын цалин нэмэх асуудал дээр “Улс орон даяар болж буй зүйлүүдийг Засаг дээр байнга ярьдаг. Цалин нэмэх асуудлыг бид нэлээд удаан хугацаанд ярьж байгаад шийдсэн. 8-30 хувиас илүү хэмжээгээр нэмбэл эдийн засагт үзүүлэх сөрөг нөлөө нь их. Өөрөөр хэлбэл Монгол Улс өр тавьж байж цалинг 50 хувиар нэмнэ гэсэн үг. Өр ямар их хэмжээний дарамт учруулдгийг бүгд мэднэ. Зээл аваад бизнес эрхэлдэг, хүүхдээ сургадаг. Тэр зээлээ хүүтэй нь төлөх гэж ямар их юм болдгийг бид бүгдээрээ мэдэж байгаа. Энэ бол яг түүнтэй адил асуудал.

Би Сангийн сайдын ажлыг авахад 1.4 их наяд төгрөгийг зөвхөн зээлийн хүүд төлдөг болсон. Монгол Улсын нийт тэтгэврийн сангийн хэмжээ 1.7 их наяд төгрөг. Ахмадуудын тэтгэвэр, бусад тэтгэвэр тэтгэмжтэй бараг тэнцэх хэмжээний мөнгийг зөвхөн зээлийн хүүд төлж байсныг тодорхой хэмжээгээр бууруулж, төсвийг цэгцлээд явж байна. Тэгэхээр дахин цалин нэмнэ гэдэг нь өрийн хэмжээ их буй энэ үед хүнд. Засгийн газар байгаа бүх боломжоо ашиглаад цалин нэмсэн. Засгийн газарт одоо өөрөөр цалин нэмэх боломж байхгүй. Үүнийг олон хүн ойлгож байгаа гэж найдаж байна" гэсэн юм.

Ерөнхийлөгч маргааш буюу энэ сарын 11-нд Багш нарын төлөөлөлтэй уулзъя хэмээсэн ч ОХУ-ын Владивосток хотноо 2018 оны 9 дүгээр сарын 11-13-ны өдрүүдэд зохиогдох Дорнын эдийн засгийн IV чуулга уулзалтад оролцохоор нисэх юм.

Б.Баргужин

www.zindaa.mn