Харумафүжиг зодог тайлахад хүргэсэн Таканоива ”хашгирсан” үгэндээ хүрэх үү?!

Мэргэжлийн сумогийн Аки башё эхлээд таван өдөр өнгөрч байна. Макүүчи зиндаанд Монголын зургаан бөх барилдаж буйн нэг нь Таканоива А.Баасандорж. Тэрбээр өнгөрсөн Нагоя башёд Жюүрёо зиндаанд зодоглон түрүүлснээр зиндаа дэвшсэн нь энэ юм. Тэгвэл үүнтэй зэрэгцээд энэ сарын сүүлчээр буюу 30-нд мэргэжлийн сумогийн 70 дахь ёкозүна Харумафүжи Д.Бямбадоржийн зодог тайлах ёслол болно.

Харумафүжи болон Таканоива нарын нэрс хэдэн сарын өмнө Монгол, Японы хэвлэлээс салахаа больж, нэг нь зодсон нөгөө нь зодуулсан хэмээн бичигдэн шуугиулсан.

Хэвлэлүүдийн мэдээлснээр бол монгол сумочид тойргийн барилдааны хий зайгаар хэдүүлээ цуглан караокед сууцгааж, ярилцсан юм билээ. Цуглах болсон шалтгаан нь Таканоива А.Баасандоржийн хэлсэн үг. Тэрбээр өмнөх өдөр нь “Би Хакухог давсан. Одоо бидний цаг ирсэн” хэмээн хашгирсан гэж Японы хэвлэлд дурьдсан байдаг. Ингэж хашгирахыг нь хавь ойрд байсан хэн нэг нь сонсоод дээшээ “алтан хошуу” өргөсөн юм биз дээ.

Ингээд маргааш нь ах зах, цол эрэмбээ мэдэхгүй залууд сургамжийн хэдэн үг хэлэхээр цуглахад Хакухо М.Даваажаргал, Харумафүжи Д.Бямбадорж, Какурюү М.Ананд нарын зэрэг ёкозүна цолтнууд болон өөр хэдэн монгол сумочид иржээ. Яриа эхлээд байтал Таканоива А.Баасандорж чихгүй толгой оргиж, утсаа маажаад суух юм гэнэ.

“Их аварга ярьж байхад юу хийгээд байгаа юм!” гэх аястай үгийг Харумафүжи хэлтэл “Найз бүсгүй рүүгээ мессеж бичиж байна” гэж Таканоива хариу өчсөн гэдэг. Энэ бол аанай л Японы хэвлэлээр гарсан мэдээлэл л дээ.

Ингэхээр нь Харумафүжи уурлаж, ах захаа мэдэхгүй асуудлаас нь болж уулзаад байтал ахиад үл хүндэтгэсэн байдал гаргасанд бухимдан ойр байсан караокений удирдлагаар толгой руу нь гөвж орхиж. Тэгсгээд тэд тарцгаасан бололтой. Хэд хоногтоо энэ явдлын талаар хэн ч юу ч ярьсангүй.

Гэтэл гэнэт хэвлэлүүд шуугиж эхэллээ. Харумафүжи Таканоивагийн тархийг шар айрагны шилээр хага цохижээ, гэмтээжээ ...гээд л хэвлэлээр бөөн юм болох нь тэр.

Таканоива эхлээд бүх асуудлыг дараад өнгөрөх гэсэн ч түүний дэвжээний багш, алдарт ёкозүна Таканохана шалгааж шаардсаар байгаад хэлүүлчихэж гэнэ. Ингээд цагдаад гомдол гаргуулжээ. Монгол сумочидтой холбоотой, ялангуяа ёкозүна Харумафүжиг “намнах” хэргийн хавтас нээгдэх нь тэр.

Хэргийн газар байсан бүх монгол сумочид ээлжлэн байцаагдаж, харин Харумафүжи удалгүй мэдэгдэл хийлээ. Тэрбээр ёкозүна цолтонд байж болохгүй үйлдэл хийсэндээ уучлалт гуйсан ч ах захаа мэдэх ёстой гэдгийг дахин тодруулан хэлсэн байдаг.

Харумафүжиг багш Исэгахама нь дагуулан Таканоивагийн дэвжээ рүү очиж албан ёсоор биеэр нь уучлалт гуйлгах гэсэн боловч Таканохана ояката зөрөөд машинаар давхин оджээ.

Мэргэжлийн Сумогийн Холбоо 70 дахь ёкозүнагаа зодог тайлуулахаар шахаж эхэллээ. Өмнөх башёд гарамгай барилдан гайхалтай сайхан түрүүлсэн аварга зодог тайлахаас өөр аргагүйд хүрэв.

Харин Таканоива хэвлэлд нэг ч мэдэгдэл хийлгүй, дэвжээндээ бүгсээр өнгөрсөн. Кёкүшюүзан Д.Батбаяр Японоор очиж хэсэг бас шуугиуллаа. Асашёорюү Д.Дагвадорж ч Кёкүшюүзаныг “Муу эр дайнд хөөрнө” гэгч шиг зүйл болж байгааг сануулан, Монголоос бухимдаад авсан. Иймэрхүү үйлдэл өрнөж өрнөж цаг хугацаа урсан одсоор байна.

Харин энэ сард Таканоива дээд зиндаанд эргэн дэвшиж, Харумафүжи сумогийн дэвжээнээс эгнэгт буух болно.

Овоо босгоогүй бол шаазгай хаанаас суухав гэдэг шиг Таканоивагийн бяр нь амтагдаж цаг нь ирсэнээ мэдэж хашгирсан юм бол одоо тэр үгэндээ хүрч, ядаж түрүүлэхийн дайтай барилдана гэж монголчууд харж, ажиглан сууна.

Гүйх нохойд гүйхгүй нохой саад гэж монголчууд хэлдэг. Цалгиж явсан аваргыг зодог тайлуулахад хүргэсэн залуу одоо цаг нь ирсэн гэдгээ харуулах биз ээ.

Э.Болор

www.zindaa.mn