Нэгдүгээр сургуулийн захиралд авлига өгөх нөхцөлийг УИХ-ын гишүүн, албан тушаалтнууд бүрдүүлжээ
Авлигатай тэмцэх газар /АТГ/-аас нийслэлийн Засаг дарга С.Батболдод өчигдөр (2018.11.01) Мөрдөгчийн мэдэгдэл хүргүүлсэн. Нийслэлийн 1 дүгээр сургуулийн захирлын үүргийг түр орлон гүйцэтгэгч Г.Бум-Эрдэнийг холбогдох хууль тогтоомжийг ноцтой зөрчин, Багшийн мэргэжил дээшлүүлэх институт, нийслэлийн Боловсролын газрын харьяа байгууллагын нэр бүхий албан тушаалтнуудтай үгсэн тохирч, хамран сургах тойргийн бус хүүхдүүдийг тус сургуульд элсүүлэх, шилжүүлэн суралцуулсныхаа төлөө эцэг, эхээс удаа дараагийн үйлдлээр хахууль авсан гэмт хэрэгт холбогдуулан Мөрдөгчийн мэдэгдлийг Эрүүгийн хэрэг хянан шийдвэрлэх тухай хуулийн 29.6 дугаар зүйлд заасныг үндэслэн хүргүүлсэн байна.
Энэ гэмт хэрэг үйлдэгдэхэд хэд хэдэн шалтгаан, нөхцөл нөлөөлсөн гэж АТГ-ын мөрдөгч нар үзэж байна.
Тухайлбал, Сүхбаатар дүүргийн Боловсролын хэлтсийн бага боловсрол хариуцсан мэргэжилтэн М, 32 дугаар сургуулийн захирал М, Багшийн мэргэжил дээшлүүлэх институтын дэд захирал О нар нь Авлигын эсрэг хууль болон “Ерөнхий боловсролын сургууль, цэцэрлэг, албан бус, насан туршийн боловсролын төвийн багш, удирдах болон бусад ажилтны ёс зүйн дүрэм”-д заасныг зөрчиж, тухайн салбарт нь үйлдэгдсэн авлигын гэмт хэрэгт хамтран оролцож, өөртөө болон танилууддаа хууль бус давуу байдал бий болгосон.
Мөн УИХ-ын гишүүн, нийслэлийн агентлаг, БСШУСЯ-ны нэр бүхий албан тушаалтнууд хамран сургах тойргийн бус хүүхдүүдийг 1 дүгээр сургуульд элсэн суралцуулах агуулга бүхий хүсэлт, чиглэлийг тус сургуулийн захиралд өгч, авлига үүсэх нөхцөлийг бүрдүүлсэн. Түүнээс гадна Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 17 дугаар зүйлд заасан зохицуулалтыг хэрэгжүүлдэггүй, эрх зүйн мэдлэг дутмаг, нийслэлийн Боловсролын газар нь хууль тогтоомж, гаргасан тушаалынхаа биелэлт, хэрэгжилтийг хянадаггүй зэрэг нөхцөл, шалтгаан нөлөөлсөн болохыг Мөрдөгчийн мэдэгдэлд дурджээ.
Мөрдөгчийн мэдэгдлийн мөрөөр авлигын гэмт хэргээс урьдчилан сэргийлэх, гэмт хэрэг гарахад нөлөөлсөн шалтгаан, нөхцөлийг арилгах, дахин энэ төрлийн гэмт хэргийг үйлдүүлэхгүй байх, албан хаагчдын ёс зүйг дээшлүүлэх чиглэлээр тодорхой ажлууд зохион байгуулах, мэдэгдэлд нэр дурдагдсан албан тушаалтнуудад хариуцлага тооцож, Эрүүгийн хэрэг хянан шийдвэрлэх тухай хуульд заасан хугацаанд хариу мэдэгдэхийг хүссэн байна.
Д.Дамдин
Сэтгэгдэл ( 4 )
Наад нөхөр чинь Дархан эрхтэй Их Хурлын гишүүд рүү мурихана дээ. Хөөрхөн ч эр бол.
Багшийн мэргэжил дээшлүүлэх институтын дэд захирал О гэдэг нь Оросоогийн Оюунтунгалаг жинхэнэ удаа дараа авилга авдаг эмэгтйэ байгаа юм. Хурдхан зайлуулах хэрэгтэй. Доор гарын авилгачин шүү дээ
Өмнөх захирлаас улбаатай гэмт хэргийн улбаа байхоо. Сургуулийн ня-бо нь захирал гүррчаагаа ч билүү тэр хүнээ авилгал их авдаг гэж ярьдаг гэж дуулсан шүү
нийгэмд бгаа болохгүй бүхэн энэ 76-с эхтэй болоод бна даа.яах вэ,таминь ээ.бид эд нарыг сонгосон шүү дээ.