Цэнгэлдэх хүрээлэнгийн төслийг 14 хоногт зурж амжих уу?

Жил ирэх тусам багтаамж, өнгө үзэмж, орчин нөхцлийн хувьд гологдох болсон Цэнгэлдэх хүрээлэнгийн асуудалд улс анхаарал хандуулж эхэллээ.

Гэхдээ Улаанбаатар хотод 50-60 мянган хүний суудалтай, битүү дээвэртэй “Үндэсний төв цэнгэлдэх хүрээлэн” барих төслийн концепц, загвар зураг төсөл боловсруулах 30 сая төгрөгийн шагналын сантай уралдааныг 14 хоногийн хугацаатай зарласан, одоо хүртэл газрын асуудал нь шийдэгдээгүй байгаа гэдгээс авахуулаад үндэсний хэмжээний энэ том бүтээн байгуулалт эхлэлээсээ эргэлзээ төрүүлж байна.

10-14 хоногт бүхэл бүтэн цэнгэлдэх хүрээлэнгийн зураг төслийг гаргана ч гэж юу байхав. Тийм боломж байлаа ч гэсэн зураг төсөл боловсруулахаар зарласан хугацаа ихэнх хүмүүст аль хэдийн “эзэд” нь тодорчихсон юм биш үү, шударга шалгуур болохгүй  бололтой гэсэн хардлага төрүүлж эхэлжээ.

Нөгөөтэйгүүр Улаанбаатарын хамаг газраар үе үеийн удирдлагууд дур зоргоороо тоглосны гороор өнөөдөр Төв цэнгэлдэх хүрээлэнг хаана барихаа нийслэл ч тэр, Засгийн газар ч тэр шийдэж чадахгүй байна.

Нийслэлийн Засаг даргын Тамгын газрын дарга, “Үндэсний төв цэнгэлдэх хүрээлэн” байгуулах санал боловсруулах Ажлын хэсгийн Нарийн бичгийн дарга Э.Содномжамц “Үндэсний төв цэнгэлдэх хүрээлэн” байгуулахад зогсоол, авто зам, дэд бүтэц гээд мэдээж олон асуудал, цөөнгүй бэрхшээл нийслэлийн өмнө тулгарч таарна. Хүй долоон худгийн “Монгол наадам” цогцолборын газарт шинэ цэнгэлдэх хүрээлэнг байгуулснаар бүх зүйл нэг дороо төвлөрөх нь сайн ч гэлээ зам тавих, цахилгаан, дулаанд холбох, цэвэр, бохирын шугам татах гээд дэд бүтцийн асуудал ярвигтай. Бараг шинэ цэнгэлдэх барих зардалтайгаа адилхан өртөг шаардаж ч мэднэ. Яармагт буюу одоогийн “Буянт-Ухаа” спорт цогцолборын ордны замын зүүн талд шинэ цэнгэлдэхийг байгуулах шийдвэр Засгийн газраас гарлаа гэхэд газрын асуудлыг нь нэг тийш шийдэх хэрэгтэй байгаа. Учир нь тухайн газрыг хувийн хэвшлийн хоёр байгууллагад давхцуулаад олгочихсон юм билээ. Нэг нь дуудлага худалдааны анхны үнээ төлсөн байгаа. Засгийн газраас тухайн газрыг улс тусгай хэрэгцээнд шилжүүлж авна гэж шийдвэл нөхөн төлбөр төлж, нөгөө байгууллагыг хохиролгүй болгох асуудал яригдана” гэж ярьжээ.

Яг энэ асуудлыг Засгийн газар өнөөдрийн (2019.08.07) хурлаар авч хэлэлцээд, “Жилийн дөрвөн улиралд ажиллах цэнгэлдэх хүрээлэнг ХУД-ийн нутаг дэвсгэр, Нисэх, Яармагийн замын аюулгүйн тойргийн зүүн урд, эсвэл СХД-ийн нутаг дэвсгэр, Хүй долоон худаг, “Монгол наадам цогцолбор” орчимд барьж, 2021 оны Үндэсний их баяр наадам, Ардын хувьсгалын 100 жилийн ойгоор ашиглалтад оруулна” гэсэн чиглэл гаргалаа.

Эндээс харахад өнөөдрийн байдлаар Үндэсний цэнгэлдэх хүрээлэнгийн газрын асуудал нэг талд шийдэгдээгүй хэвээр байна гэсэн үг. Газрын маргаан үргэлжлэх нь тодорхой гэсэн үг.

Ямартай ч битүү дээвэртэй цэнгэлдэх барих санаачилга ажил хэрэг болж эхэлж байгаа нь сайн хэрэг.

“Үндэсний төв цэнгэлдэх хүрээлэн” барих, холбогдох санал, шийдвэрийн төслийг төсөв, санхүүгийн тооцооны хамт боловсруулах үүрэг бүхий Ажлын хэсгийг Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ ахлан ажиллахаар томилогдсон. Тэгэхээр Монгол Улсын сайд  зураг төслийн шалгаруулалт нь үнэн зөв, шударга явагдахаас эхлээд онцгой анхаарал хандуулах нь зөв биз ээ.