Төрийн албаныхны хариуцлагыг нэмэгдүүье!

-“Сайд, дарга нар явдаг, бид үлддэг” хэмээх хэлц үг тэдний дунд хэлэгддэг-

Залуучууд хэний ч шахалт, шаардлагагүй төв талбайдаа үзэл бодлоо илэрхийлж, хариуцлага, ёс зүй нэхэн жагссанаар үр дүнгээ өглөө. Халдвар авсан нь батлагдсан дөнгөж амаржсан эхийг ХӨСҮТ-рүү зөөвөрлөх явцыг сэтгүүлч, зураглаач хоёр олон нийтэд ил тодоор мэдээллээгүй бол ийм зүйл болохгүй байсан гэдгийг сануулах нь зүйд нийцнэ. Гэвч хариуцлага хүлээсэн хүмүүс бол зүгээр л нэг их усан дээр тогтсон хөөс юм. Үүний доор төрийн албан хаагч гэсэн сайхан шошго нүүрэндээ наасан их усыг жинхэнэ бохирдуулагчид бий.

Ажилдаа чин сэтгэлээсээ ханддаг, ёс зүйтэй олон албан хаагч байгааг энэ дашрамд хэлэх нь зүйтэй. Гэвч тэдний чин сэтгэл, хичээл зүтгэлийг цөөхөн хэдэн шимэгчид үгүй хийж, нийт төрийн албан хаагчдын нэр хүндийг унагасаар өнөөдөр бүр ёроолдоо хүрчихлээ.

“Төр түмнийхээ төлөө зүтгэж байгаа”, “Энх цагийн баатрууд” гэсэн лоозон маягийн шүлэг дуугаар дамжуулсаар байгаад тэднийг ингэж давраасан хэрэг. Амин хувиа хичээж, өөрийн ажлаа хурдхан бүтээхийн тулд урд, хойно нь бөхөлзөж, алгыг нь дээш харуулсаар ирсэн нь ч ийм болгосон нэг том шалтгаан. Уг нь бол тэд ардчилсан, чөлөөт зах зээлтэй улсад өөрсдийн сонгосон мэргэжилээрээ цалин урамшуулалаа аваад л оногдсон ажлаа хийж байгаа хүмүүс. Түүнээс биш тэднийг хэн нэгэн эмч, цагдаа бол, төрийн албанд л ажилла гэж үүрэг даалгавар өгөөгүй. Магтуулсаар байгаад мангуу болчихлоо гэдэг шиг тэд хүний өмнөөс ажил хийж байгаа юм шиг ялархсан, гоморхсон байдалтай болчихсон. Дээрээс нь “Сайд, дарга нар явдаг, бид үлддэг” гэсэн хэлц маягийн хэллэгийг ч өөр хоорондоо ярилцдаг.

Шинэхэн дарга шударга ёс, хариуцлага яриад ажлын бүтээмж шаардаад эхлэхээр элдэв янзын арга заль хийсээр байгаад өнөөхөө шилийг нь харчихаад энэ үгээ бахдалтай нь аргагүй ярилцаж суудаг. Монголчууд эртнээс зүгээр ч нэг “Хаанаасаа хаалгач нь” гэж хэлээгүй. Хаан ямар ч сайхан шийд гаргасан байлаа гэсэн хаалгач нь түүнийг хэрэгжүүлэхдээ сэтгэлгүй, гар харсан, үл ойшоосон байдалтай байхад л жирийн иргэдэд хааны шууд тушаал мэтээр тусна. Итгэлт баян “Хүрээний бузрыг ухвал далай, далай” гэж суудаг шиг төрийн албаныханы энэ мэт увайгүй байдлыг ухвал их юм гарна. Төрийн албан хаагчдын тухай гомдол, саналыг хянаж шалгадаг, шийдвэрлэдэг тусгай газар байгуулсан ч болохгүй юмгүй. Алдаа дутагдал гаргасныг нь залруулаад болохгүйг нь болохоор нь сольдог, дарга, цэрэггүй хариуцлага тооцдог байж гэмээнэ цаашид энэ бүхэн эрүүлжинэ.