С.Эрдэнэбат: Иргэд цалингийнхаа 19 хувийг зөвхөн тэтгэврийн даатгалд төлөхөөр болж байна

Нийгмийн даатгалын шимтгэлийг 2 хувиар нэмж тооцон, нийт 26 хувийн шимтгэл авах хуулийн хэрэгжилтийг төрийн байгууллагууд,  төрийн болон  орон нутгийн өмчит компаниуд 2021 оны нэгдүгээр сарын 1-ний өдрөөс эхлэн ханган ажиллаж байгаа юм. Хувийн хэвшлийн аж ахуйн нэгжүүд буюу дээрхээс бусад ажил, үйлчилгээ эрхлэгчид хуулийг ирэх долоодугаар сарын 1-ний өдрөөс эхлэн дагаж мөрдөх заалт үйлчилж байна.

Тэгвэл уг асуудлаар өнөөдөр МҮЭХ-ноос дахин байр сууриа илэрхийллээ. Нийгмийн даатгалын санг цөлмөсөн буруутай этгээдүүдээр мөнгийг нь төлүүлж, сангаа бүрдүүл. Тэдний тарьсан өр, гайг "Цалингаас өөр орлогогүй ажилтан хүн"  үүрэх ёсгүйг санууллаа.

МҮЭХ-ны дэд ерөнхийлөгч С.Эрдэнэбат хэлэхдээ “ОУВС-гийн Өргөтгөсөн санхүүжилтийн хөтөлбөрийг 2017 онд  хэрэгжүүлж эхлэх үед Нийгмийн даатгалын сан тэр дундаа Тэтгэврийн даатгалын санд Засгийн газар буюу төрөөс өгч байгаа татаас өндөр байна, сангийн орлого, зарлагыг тэнцвэржүүлэх ёстой гэдэг үүднээс орлогын хэмжээг нэмэх шаардлагатай байна гэж үзсэн. Ингэхдээ  шууд шимтгэл нэмэх байдлаар шийдэх гарцыг сонгосон нь нэг талаар буруу гэдгийг тухайн үед ч МҮЭХ-ны зүгээс  тавьж байсан.

Тэтгэврийн даатгалын тогтолцооны шинэчлэлийг хийхгүйгээр, үр өгөөжийг сайжруулахгүйгээр илүү шимтгэл төлөх дарамтыг  ажилтнууд болон ажил олгогч нарт үүрүүлж буй нь 100 хувь зөв шийдэл биш юм аа гэсэн байр суурийг дандаа илэрхийлж байгаа.  ОУВС-гийн хөтөлбөрт орсноос хойш гурван ч Засгийн газар солигдлоо. Энэ хугацаанд хөтөлбөр дууссан. Коронавирусний хүндрэлтэй үе залгасан.

ОУВС-гийн хөтөлбөрийн хүрээнд 2018 онд 1 хувь,  2019 онд 0.5 хувиар шимтгэл нэмэгдсэн. 2020 онд нэмэгдүүлэхээр тусгасан шимтгэл яагаад хэрэгжээгүй вэ гэхээр МҮЭХ-ноос  шаардлага тавьсантай холбоотой. Нийгэм, эдийн засгийн хүндрэлтэй байгаа үед тэтгэврийн шинэчлэлийг хйихгүйгээр шимтгэлийг нэмж байгаа нь буруу гэдэг шаардлагаа дахин  тавьсантай холбоотойгоор  УИХ,  Засгийн газар тухайн үедээ шаардлага хүлээж авсан. Хүлээж авахдаа хуулиа  бүрэн цуцлаагүйгээр хэрэгжилтийг  нэг жилээр хойшлуулсан. Үүнийгээ  тайлбарлахдаа ОУВС-гийн хөтөлбөр дуусаагүй. Амлалт авсан тул буцаж болохгүй гэж байлаа.

Одоо ч манай шаардлага хэвээрээ. Дээр нь коронавирусний улмаас нөхцөл байдал улам хүндэрсэн байна. Гэтэл сая намрын чуулганаар үүнийг шийдсэнгүй. Оны өмнөөс уг асуудлыг МҮЭХ байнга тавьж байсан.

Төрийн байгууллага, төрийн  болон орон нутгийн өмчит компаниуд, үйлчилгээний газруудын 300-400 мянган иргэн нэгдүгээр сараас эхлэн нэмэгдэлтэй хэмжээгээр НДШ төлж эхэлсэн. Иргэд сарын цалингийнхаа 19 хувийг зөвхөн тэтгэврийн даатгалд төлөхөөр болж байна. Цалингийн  0.1 хувь ч орлогод хэрэгтэй байгаа үед энэ буруу гэдгийг бид хэлж, сануулж байна. Энэ асуудлыг заавал жагсаал цуглаанаар шийдэх байдалд оруулж байгаа бол МҮЭХ бэлэн. Гэхдээ хүнд хэцүү цаг үед аль болох эв зүйгээр, аль аль талдаа хүндрэл үүсгэхгүйгээр шийдэх ёстой байна.