ОЛОН ӨНГӨ: Цагаан сар ба хар тортог

Сар шинэ дөхөж буйтай холбогдуулж хатуу хөл хориог 12 хоног сунгачихлаа. Монгол хүн байна даа айл бүхэн хэрдээ таарсан идээ будаа, бууз банш болж гэр бүлийн хүрээндээ золгуут хийж ёслох нь дамжиггүй биз ээ. Хүмүүс гэр гэртээ  байх энэ өдрүүдэд гал түлэх нь ердийн үеэсээ хэд дахин ихсэж, агаарын бохирдол ч төдий чинээгээр нэмэгдэх нь тодорхой. Хэдийгээр өмнөх жилүүдээ бодоход утаа шингэрсэн ч сайжруулсан түлшний хөө тортог үс хувцсанд шингэж,  нүүрс хүчлийн хий нь аманд амтагдаж, толгой өвдөж, дотор муухайруулсан хэвээр байна. Манайхан аливаа зүйлийн өнгөн хэсэгт хууртаад утаа шингэрч ариллаа л гээд байдаг. Гэтэл чанар нь хэвээрээ төдийгүй илүү ч хоруу чанартай болсныг үгүйсгэх аргагүй. Та бүхэн гэр хорооллыг нүдээ нээгээд сайн хараад үзээрэй. Бөмбөгөр хар гэрүүд, бүүдийсэн гудамж л угтана. Цас чинь цагаан байдаг даа. Тэгвэл гэр хороололд хар цастай. Учир нь мөнөөх хөө тортог нэвсийтэл буусных.

Нүдэнд үл үзэгдэх нанги тортог,нүүрсхүчлийн хий хүний ам хамар, амьсгалах агаараар дамжин уушги хоолойг бохирдуулан үрэвсүүлж, харшил ханиаданд дарлуулсан, мэнгэр бронхиттой хүмүүс л болох нь байна шүү. Цагаан сар ч яах вэ хар тортогоосоо яаж салах вэ.