ДЭМБ: Вероселл вакцины туршилт бүх насны ангилалд хийгдэж, 79% үр дүн үзүүллээ 

Э.Мөнхжин | Zindaa.mn
2021 оны 05 сарын 09

Улсын хэмжээнд коронавирусний вакцинд зорилтот бүлгийн 74.3 хувь, нийслэлд 93 хувь хамрагдаад байна. Хоёрдугаар тунд хамрагдалт улсын хэмжээнд 29.9 хувьтай байна. Өнөөдөр вакцины ээлжит татан авалт хийгдэх аж.

Сануулахад, Монгол Улсын Засгийн газраас ард иргэдээ вакцинжуулж буй БНХАУ-ын Синофарм үйлдвэрийн BBIBP Вероселл вакциныг ДЭМБ яаралтай журмаар бүртгэн авсан. Тодруулбал, 2021 оны тавдугаар сарын 7-ны өдөр Дэлхийн эрүүл мэндийн байгууллага Sinopharm COVID-19 вакциныг яаралтай горимд хэрэглэхийг зөвшөөрсөн жагсаалтад бүртгэсэн юм.  Уг вакциныг China National Biotec Group (CNBG)-н Бээжингийн биологийн бүтээгдэхүүний институт үйлдвэрлэж байна.

Уг вакцины хадгалалтын нөхцөл энгийн бөгөөд гадна талдаа хадгалалтын горим алдагдаж халсан тохиолдолд өнгө нь хувирдаг илрүүлэгч наалттай анхны вакцин гэдгээрээ онцлог юм байна.  Туршилт бүх насны ангилалд хийгдэж 79% үр дүнтэй гэж дүгнэжээ.

Монголын Засгийн газар хүн амаа дархлаажуулах зорилтын хүрээнд Вероселл вакциныг БНХАУ–ын хүмүүнлэгийн тусламжийн хүрээнд 300,000 тун, арилжааны шугамаар 2,334,400 тун хүлээн авсан билээ. Энэ тавдугаар сард мөн арилжааны шугамаар 1,665,600 тун Вероселл вакциныг татан авахаар төлөвлөж байна.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top