Өнөөдөр нээгдсэн "Номын баяр" амралтын өдрүүдэд үргэлжилнэ

“Номын соёлт ертөнц” ТББ 2007 оноос хойш жил бүрийн хавар, намар тасралтгүй зохион байгуулж буй “Номын баяр” 29 дэх удаагаа уншигчдадаа үүдээ нээж байна.

Өнгөрсөн оноос УИХ-ын дарга Г.Занданшатар уг баярыг ивээлдээ авч царааг тэлэхээр ажиллаж байна. Мөн Нийслэлийн Засаг даргын Тамгын газар Улаанбаатар хотын төв талбайд болдог соёлын үйл ажиллагааг дэмжиж, “Дэлхийн номын нийслэл”-д нэр дэвших зорилгоор  хамтран зохион байгуулж байна.

Цар тахлын үед Монгол түмэн хорио цээрийн журмаа мөрдөн өнгөрсөн хавар, намар номын баяраа өргөн дэлгэр зохион байгуулсан бол энэ жилийн хаврын ээлжит баяраа UBS телевизтэй хамтран “Номын баяр” телевизийн хөтөлбөрөөр эхлүүлүүлсэн билээ.

Олон зуун мянган хүнд ном унших баяр баясгаланг бэлэглэдэг, хүүхэд, залуусыг ном уншихад нөлөөлдөг “Номын баяр” энэ удаа “Илүү их уншъя” уриан дор зохион байгуулагдаж байна.

Д.Сүхбаатарын талбайд гурван өдрийн турш болдог, жилээс жилд ач холбогдол, нийгмийн хүлээлт нь улам бүр нэмэгдэж буй “Номын баяр”-т дунджаар 100  гаруй хэвлэн нийтлэгч компани, 80 орчим номын худалдаа эрхлэгч, 300-аад зохиолч, орчуулагч, редактор, зураач, эх зохиогч, 50000 гаруй уншигч, сонирхогчид оролцдог.

Номын баярын үндсэн арга хэмжээг зохион байгуулахад санаачлагч, баярын зөвлөлийн гишүүд, номын ертөнц клубын сурагчид, сэтгүүлийн редакц, зохион байгуулах баг, дэмжигчид, оролцогчид болон уншигчид гар бие оролцдог.

Харин энэ жил цар тахлын хөл хорионы дэглэм сулраагүй, номын баярын товлосон хугацаа хойшилсон ч баяраа сэтгэл догдлон хүлээдэг уншигчдаа баярлуулахаар "Номын баяр”-ын зохион байгуулах баг ажиллаж байна.

Номонд дурлагч та бүхнийг 2021 оны 6-р сарын 11-13-нд халдвар хамгааллын дэглэмээ мөрдөн, оролцогч бүр вакциндаа хамрагдаж, бага насны хүүхдээ дагуулахгүйгээр хүрэлцэн ирэхийг урьж байна.

НОМЫН БАЯРЫН ӨДРҮҮДЭД БОЛОХ АРГА ХЭМЖЭЭ

1. Дэлхийн номын нийслэл болцгооё уриалга
2. “Номын баяр - бидний баяр” гэрэл зургийн үзэсгэлэн
3. “Ковид ба бид” гэрэл зургийн үзэсгэлэн
4. Book launch дизайнеруудын оролцсон нэг өдрийн хөтөлбөр
5. Шинэ номын нээлтүүд
6. 2021 онд гарсан шинэ номын сурталчилгаа загвар, хувцас
7. Номын хямдралтай худалдаа
8. Зохиолчдын уулзалт
9. “Нэг номын сан” сайн үйлсийн аян
10.  Номын солилцоо
11.  Ном сэргээн засварлах
12.  Ном зүйчийн зөвлөгөө
13.  Номын клубын өдөрлөг
14.  Номын сангийн уншигч болцгооё
15.  Гэрэл зургийн уралдаан зарлах
16.  “Номтой өглөө” нэвтрүүлэг талбайгаас
17.  Кофе ууя - ном яръя амралтын булан
18.  Санал хүсэлтээ илэрхийлье
19.  Талархал гардуулах
20.  Урлагийн тоглолт
21.  Хэвлэлийн газруудын өдөрлөг
22.  Хаягдал цаас хүлээн авах цэг ажиллуулах
23.  “Номын ертөнц” сэтгүүлийн тусгай дугаар
24.  Номын редакторуудын өдөрлөг
25.  УИХ-ын гишүүдийн номын үзэсгэлэн, хуулийн сурталчилгаа
26.  “Номын баяр” телевизийн нэвтрүүлэг
27.  Түр номын сан ажиллах, эцэг эхчүүдэд ном сонгох зөвлөгөө
28.  Хамтрагч байгууллагуудын хөтөлбөр
29.  “Илүү их уншъя” сошиал аян