ШАТАХУУН: АИ-92-ын үнэ 40, АИ-95-ынх 20 төгрөгөөр нэмэгджээ

АИ-92 бензиний үнэ 40-50 төгрөгөөр, АИ-95 бензиний үнэ 20 төгрөгөөр нэмэгдлээ. 

Өнгөрсөн оны долдугаар сараас эхлэн шатахууны үнэ шат дараатай нэмэгдэж, өнөөдөр АИ-92 литр тутамдаа 2285-2290, АИ-95 литр тутамдаа 2270 төгрөгийн үнэтэй болжээ.

АИ-92 шатахууны үнийг чөлөөлөхөөр шийдэж байгаагаа Уул уурхай, хүнд үйлдвэрийн дэд сайд О.Батнайрамдал 2021 оны сүүлээр мэдэгдэж байв. Ингэснээр хэд хэдэн давуу талтай гэж тайлбарлаж байсан юм.

Тухайлбал, 
 

• Төр шатахууны үнэд оролцохгүй
• Дэлхийн зах зээл дээрх шатахууны үнийн өсөлтийг дагаж үнэ хөдөлнө
• Үнийн огцом өсөлт бий болгохгүйн тулд сүүлийн зургаан сарын үнийг дундчилдаг болно. Ингэснээр дэлхийн зах зээлд үнэ өсөхөд иргэдэд огцом өсөлтийг мэдрүүлэхгүй буюу зах зээлд шок үүсгэхгүй байх нөхцөл бүрдэнэ
• Нэг удаад нэмэгдэх дээд хязгаар 100 төгрөг байна
• Төсвийн ачаалал дарамт буурна
• Шатахуун импортлогч компаниуд зах зээлийн зарчмаараа, төрийн дарамтгүй ажиллах нөхцөл бүрдэнэ гэж салбарын яам тооцож байжээ. 

Өнгөрсөн хугацаанд төрөөс зах зээлд оролцож, үнийг тогтоон барьсантай холбоотойгоор шатахуун импортлогч компаниуд 66.4 тэрбум төгрөгийн алдагдал хүлээсэн гэх мэдээлэл бий. 

Хэрэв төрөөс оролцсоор байвал энэ алдагдал 2021 оны эцэс гэхэд 100 тэрбум төгрөг давахаар байгааг Уул уурхай, хүнд үйлдвэрийн сайд Г.Ёндон тайлбарлаж байсан билээ.