Донецк 1995-2004 онд төрсөн иргэдийг ЦЭРЭГТ ТАТАХААР болов

Донецкийн тэргүүн Денис Пушилин 1995-2004 оны хооронд төрсөн иргэдийг цэрэгт татах тухай зарлиг гаргажээ.

Зарлигт мөн дотоод хэргийн яам, прокурорын газар, төрийн алба хаагчдаас бүрдсэн тусгай анги нэгтгэл байгуулах тухай заажээ. Түүнчлэн, 55-аас дээш насны эрчүүдийг сайн дурын үндсэн дээр дайчлахаар болжээ.

-Донбассыг хамгаалагчдад илүү орчин үеийн агаарын довтолгооноос хамгаалах систем, танк, их буу шаардлагатай байна гэж Донецкийн босогчдын “Восток” батальоны орлогч дарга Александр Семенов мэдэгджээ.

-БНХАУ-ын эрх баригчид ОХУ Донецк, Луганскийн бүгд найрамдах улсыг хүлээн зөвшөөрсний дараагаар нөхцөл байдлыг хурцатгахаас сэргийлэх нь туйлын чухал гэж үзэж байна. Тус улсын Гадаад хэргийн яамны албан ёсны төлөөлөгч Ван Вэньбиний мэдэгдсэнээр, Хятад улс оролцогч талуудыг хүлээцтэй хандахыг уриалж байна. Үл ойлголцлыг яриа хэлэлцээний замаар шийдвэрлэх шаардлагатай. Украины талаар БНХАУ-ын баримталж буй байр суурь өөрчлөгдөхгүй. Хятад улс аливаа зөрчилдөөнийг энхийн замаар НҮБ-ын дүрмийн дагуу шийдвэрлэх ёстой гэж үзэж байна гэж Ван Вэньбин онцолжээ. Түүний хэлснээр, Украины асуудал түүхэн хүчин зүйлсээс шалтгаалсан төвөгтэй асуудал гэв.

-ЕАБХАБ-ын тусгай баг Украины хүчнийхэн олон улсын хүмүүнлэгийн эрх зүйн хэм хэмжээг зөрчиж буйг баталсан тухай Луганск мэдээлжээ.

Энэ сарын 21-нд гаргасан тайландаа тус баг Украины хүчнийхэн иргэдийн орон сууц, үйлдвэрийн газруудад цохилт өгснийг баталжээ.

-Донецк, Луганскаас ОХУ-д нүүлгэн шилжүүлсэн дүрвэгсдийн тоо 80 мянгыг давжээ. Тэдний 50.5 мянга нь Украины иргэншилтэй бол 30 мянга гаруй нь Оросын иргэд байна. ОХУ-ын Орлов муж дүрвэгсдэд ажлын байр гаргахад бэлэн гэдгээ мэдэгджээ.