Д.Ариунцэцэг: Зургаан жилийн турш "Хаан банк"-наас мөнгөө нэхэмжиллээ

Солонгос улсад ажиллаж, амьдарч байх хугацаандаа "Хаан банк"-нд хугацаатай хадгаламж нээлгэж, мөнгөө хадгалуулсан ч тус банкны ажилчдын хариуцлагагүй байдлаас болж мөнгөө алдсан гэх иргэн Д.Ариунцэцэг өнөөдөр (2022.03.09) эсэргүүцлээ илэрхийллээ. 

Түүний хувьд гэр бүлийн хамт Солонгос улсад ажиллаж, амьдардаг байжээ. Энэ үедээ "Хаан банк"-нд 15 хувийн хүүтэй хугацаатай хадгаламж нээлгэж, мөнгөө хадгалуулсан байна. Гэтэл 2015 оны арванхоёрдугаар сарын 30-нд хэсэг бүлэг хүмүүс хуурамч нотариатын бичиг үйлдэж, Д.Ариунцэцэгийн хадгаламжийг барьцаалж зээл авчээ. Хаан банкны зүгээс иргэн Д.Ариунцэцэгтэй холбогдож баримт бичгийг нягтлахгүйгээр хуурамч бичиг баримт үйлдсэн иргэдэд зээлийг олгосон байна. Улмаар тухайн иргэд зээлээ төлөөгүйн улмаас иргэн Д.Ариунцэцэгийн хадгаламжаас 63 сая төгрөг татан авсан байна. Д.Ариунцэцэгийн хувьд цагдаад гомдол гаргаж, зургаан жилийн турш шүүхээр явсны эцэст Хаан банкнаас мөнгөө буцаан авсан ч хадгаламжийн хүүг нь олгохгүй байгаа аж. 

ВИДЕО ХЭЛБЭРЭЭР ҮЗЭХ: 

Энэ талаар тэрбээр "Утсанд маань ирсэн хүү бодох мэдэгдлийн ачаар мөнгийг маань татсан байгааг мэдсэн. Тэр даруй Солонгос дахь Хаан банкны мэргэжилтэнд хандсан. Гэтэл "Та хадгаламж барьцаалсан зээл авсан байна. Үүнийг Монголын төв салбар руу мэдэгдэж шалгуулаарай" гэсэн. Улмаар төв салбар руу холбогдоход Монголд хэсэг бүлэг иргэд хуурамч бичиг баримт үйлдэж, нотариатаар батлуулаад миний хадгаламжийг барьцаалж зээл авсан байсан. Ингээд зээлээ эргэн төлөөгүйн улмаас хадгаламжаас татаж авсан. Энэ асуудлаар Хаан банканд хандахад "Энэ асуудалд нотариатчид буруутай учраас та цагдаад ханд" гэж хэлсэн. Тэгээд би цагдаад хандсан юм. Уг нь энэ асуудлаар иргэний шүүхээр явах ёстой байсан юм билээ. Гэтэл цагдаад хандсаны улмаас энэ хэргээр эрүү үүсчихсэн. Ингээд зургаан жилийн турш хууль, шүүхээр явж байна.

Анхан шатны шүүхийн хариу хоёрдмол, эргэлзээтэй гарсан. Энэ нь шүүгдэгч нар надад 63 сая төгрөг төлөх ёстой. Хаан банк ч 63 сая төгрөг төлөх ёстой гээх хоёрдмол хариу гарсан. Улмаар давж заалдсан.

Би Хаан банканд мөнгөө хадгалуулсан харилцагч учраас тус банкнаас л мөнгөө нэхэмжилсэн. Давж заалдах шатны шүүхийн хариу зөв гарч, Хаан банкнаас миний 63 сая төгрөгийг төлөх ёстой гэсэн шийдвэр гарсан. Гэтэл Хаан банк дахин давж заалдсан. Гэсэн ч дээд шүүхийн хариу миний талд гарч, Хаан банк мөнгийг минь төлөхөөр болсон юм. Улмаар өнгөрсөн хоёрдугаар сард мөнгийг минь буцаан олгосон ч хадгаламжийн хүү маань огт бодогдохгүй байгаа. Энэ талаар өөрсдөөс нь асуухад "Та хадгаламжийн хүүгээ шүүгдэгч нараасаа нэхэмжилж ав" гэж хэлсэн. Энэ бол Хаан банкны ажилчдын хариуцлагагүй байдал, буруу үйл ажиллагаанаас болсон учраас энэ бүхэнд Хаан банк бүрэн хариуцлага хүлээх хэрэгтэй" гэсэн юм.