Галт тэрэгний хуваарьт өөрчлөлт оруулав

"Улаанбаатар төмөр зам" компани Үндэсний их баяр наадмыг тохиолдуулан галт тэрэгний зорчих хуваарьтаа зарим өөрчлөлтийг оруулж, наадамчдад зориулсан нэмэгдэл галт тэрэг аялуулахаар болсон байна. Долдугаар сарын 10-13-нд Эрдэнэт-Дархан-Улаанбаатар чиглэлийн 311/274 дүгээр галт тэрэг Давааны зөрлөгт хоёр минут зогсох юм байна. Мөн Улаанбаатар-Эрдэнэт, Улаанбаатар-Сүхбаатар, Улаанбаатар-Бор-Өндөр чиглэлд нэмэгдэл галт тэрэг аялах аж. Харин долдугаар сарын 10,14-ний Улаанбаатар-Эрээний 22 дугаар галт тэрэг, долдугаар сарын 9, 13, 16-ны өдрүүдэд Улаанбаатар-Замын-Үүд чиглэлд зорчих 44 дүгээр галт тэрэг зорчигчдод үйлчлэхгүй байх шийдвэр гаргажээ. Бусад зорчигчдын галт тэрэгний хуваарьт өөрчлөлт ороогүй байна.

Эх сурвалж: Улс төрийн тойм сонин