“Шинэ сэргэлтийн бодлого”-ыг хэрэгжүүлэхийн төлөө хэнтэй ч хамтрахаас буцахгүй

Үндсэн хуулийн цэцээс дан, давхар дээлний асуудлыг эцэслэн шийдвэрлэснээр Засгийн газарт хөдөлгөөн орох нь тодорхой болсон. Ингэж байж МАН-ын дарга, Ерөнхий сайд Л.Оюун-Эрдэнэ “Шинэ сэргэлтийн бодлого”, Үндсэн хуулийн нэмэлт, өөрчлөлт гэсэн хоёр том давааг давна.

Үүний төлөө тэрбээр чөтгөртэй ч хамтрахаас буцахгүй бололтой. Ийм дүр зураг сүүлийн үеийн нөхцөл байдлаас харагдах боллоо. Тухайлбал, түүнийг “Шинэ сэргэлтийн бодлого”-ыг хэрэгжүүлэхийн төлөө улс төрд ногоон гэрэл асаахаар бусад намуудаас сайд томилох гэж байгаа гэх мэдээлэл чих дэлсч байна. Үүний өмнөтгөл гэх үү, оршил гэх үү, ерөөс бий болсон нөхцөл байдал ч гэж хэлж болох зүйл нь дэлхийн геополитикийн хурдтай өөрчлөлт, хүчний шинэ төвүүдийн шилжилтүүдийг судлаачид эртнээс ярьсан.

Сүүлийн үед дэлхий нийтийг хамарсан цар тахал, түүнээс үүдсэн эдийн засгийн хямрал, зам харилцаа, ачаа эргэлт, тээврийн салбарт гарч буй хязгаарлалтууд, хүнсний хомсдол Монголыг тойрсонгүй. Гадаад, дотоод нөхцөл байдлаа харсан ч, улсынхаа тусгаар тогтнол, аюулгүй байдалд анхаарахад Үндсэн хуулийн өөрчлөлт зайлшгүй гэдгийг улс төрийн намууд дэвшүүлж байв.

Энэ бүхний үндсэнд Үндэсний эв нэгдлийн Засгийн газар байгуулах санал, санаачилга улс төрийн хүрээнд гарсан уу, ямартай ч ийм томъёоллыг оруулж ирсэн гэлцэж байна. Одоогоор зөвшилцөл ид дундаа яваа гэх. Төрийн гурван өндөрлөг буюу ҮАБЗ-ийн гишүүд зөвлөлдөж, МАН-ын удирдлагууд ч зөвлөлдөх уулзалт хийсэн гэсэн мэдээлэл гарсан. Бусад зөвшөөрөхгүй бол УИХ-д үнэмлэхүй олонх болсон Ардын нам сөгдөж бөхийгөөд байх шаардлагагүй хэмээн гэдэлзэж буй гишүүд ч нам дотроос нэлээд бий  гэлцэнэ.

Энэ үнэн бол Ерөнхий сайд Л.Оюун-Эрдэнэ Ардчилсан нам /АН/-ыг танхимдаа урина гэсэн үг. АН-ын гишүүд дотооддоо учраа олохгүй байгаагаас биш, парламентад бас ч гэж сөрөг хүчин хэмээн сууж буй. Цаана нь Хөдөлмөрийн үндэсний намаас УИХ-д сууж буй Т.Доржханд гишүүн бий. Үнэхээр Үндэсний эв нэгдлийн Засгийн газар байгуулж, дэд сайд, Төрийн нарийн бичгийн дарга, агентлагийн дарга нар гээд шат шатандаа томилгоо яривал Үндсэн хуулийн нэмэлт, өөрчлөлтийн багт ажиллаж буй МҮАН, ИЗНН, МУНН-ынхан ч орж ирэх биз. Чухам ямар яриа, тохироо хийсэн нь өнөөдөр тодорхой болно гэж зарим хэвлэлүүд мэдээлсэн. Амралтын өдрүүдээр эрх баригчид шийдэлд хүрсэн эсэхээс шалтгаалах болов уу.

Ер нь бол гүйцэтгэх засаглалын хөсөг тэргийг хөтөлсөн үе үеийн Ерөнхий сайд нарт улсынхаа хөгжилд оруулсан хувь нэмэр, түүхэнд үлдэх өв гэж байдаг. Манай засгийн тэргүүн нар янз бүрийн л түүхтэй. Ер нь бол Төрийн ордны ханан дээр зургаа хадуулсан Ерөнхий сайд байхыг хэн л хүсэв гэж. Бүгд л хийсэн бүтээснээрээ улсынхаа түүхэнд үлдэх Засгийн газрын тэргүүн байхыг хичээдэг байх. Ийм утгатай үгийг Л.Оюун-Эрдэнийн өмнө засаг барьсан 30, 31 дэх Ерөнхий сайд маань ч хэлж байв.

Гэхдээ хэрхэн хэрэгжүүлэх вэ гэдэг нь улс орны эдийн засаг, улс төрийн нөхцөл байдал, хөршүүдтэйгээ хэр ойлголцож, гадаад харилцаагаа хэрхэн явч явахаас ихээхэн шалтгаална. Энэ зуны хувьд хойд, урд хөршийн Гадаад харилцааны сайд нар шил дараалан айлчилж, НҮБ-ын ерөнхий бичгийн дарга хүртэл манай улсад өөрийн биеэр хүрэлцэн ирсэн. Өдгөө  БНСУ-ын Гадаад харилцааны сайд айлчилж байна. Боомтыг хөгжүүлэх шинэ сэргэлтийн бодлого, хойд, урд хөршөөс шалтгаалах аливаа асуудлаар Л.Оюун-Эрдэнэ байж болох бүхий л гарц шийдлийг хайж, боломжийн үүд хаалгыг нээсэн гэж ойлгогдож байгаа. Тэгэхээр одоо дотооддоо эв нэгдлийг хангах л үлдсэн. 

Ч.ЗОТОЛ

Эх сурвалж: Өглөөний сонин