ХҮЛЭЭЛТ: Бодлогын хүүг нэмж өсгөлгүй ХАРЗНАХ УУ?

Мөнгөний бодлого цаашид хэр хэмжээнд хатуурах вэ? гэдэг нь энэ жилийн болон ирэх жилийн төсвийн зардал, валютын урсгалаас шууд хамаарна гэж Монголбанкны ерөнхийлөгч Б.Лхагвасүрэн хэлж байна.

Тэрбээр Монголын бизнесийн зөвлөлийн гишүүдэд эдийн засгийн байдал, цаашдын төсөөлөл, Төв банкнаас хэрэгжүүлж буй бодлогын талаар танилцуулахдаа ийн дурдлаа.

Түүний илтгэлд "Нийлүүлэлтийн шинэ шок үүсэхгүй тохиолдолд инфляц алгуур буурах хүлээлттэй. Үнэ-Цалин ээлжлэн өсөх үзэгдэл болон үнийн өсөлтийн хоёр дахь үеийн нөлөө үүсэж болзошгүй байна. Хэрэв цалин хурдтай инфляцаас давж нэмэгдвэл инфляцын төсөөлөл нэмэгдэнэ.
Инфляцын хүлээлтийг дунд хугацаанд тогтворжуулах шаардлагатай.

Энэ нь мөнгөний бодлого хатуурах зайлшгүй нөхцөл болно. Хэр хэмжээнд хатуурах вэ? гэдэг нь энэ жилийн болон ирэх жилийн төсвийн зардал, валютын урсгалаас шууд хамаарна. Шинэ суурьтай /2020/ инфляц зарлагдана.Төсөөллийн тодорхой бус байдал өндөр байна" гэв.
 
Тов ёсоор Мөнгөний бодлогын хороо энэ долоо хоногт хуралдах ёстой.
 
Төв банкны удирдлагын зүгээс төсөв сангийн бодлого, мөнгөний бодлогын уялдаа хамаарал чухал байгааг тодотгож байна. 

Дашрамд дурдахад, эдийн засагт үүссэн нөхцөл байдлыг сайжруулах, үнийн өсөлтийг хазаарлахын тулд мөнгөний бодлогыг үргэлжлүүлэн хатууруулах шаардлага бий болж байна гэсэн байр суурийг Эдийн засгийн хөгжлийн сайд Ч.Хүрэлбаатар  илэрхийлсэн. Үнийн өсөлтийн эрчим  хадгалагдаж буй нь төлбөрийн тэнцлийн алдагдалтай холбоотойг тэрбээр тодотгосон юм.

Ерөнхийдөө  Засгийн газрын зүгээс эдийн засагт үүссэн нөхцөл байдал, үнийн өсөлтөд нөлөөлж буй үндсэн асуудлууд буюу оношийг нь ойлгож, хүлээн зөвшөөрч байгаа ч, эмчлэх үүргийг нь  мөнгөний хатуу бодлогод илүү хамаатуулах хандлага давамгайлж байгааг өмнө нь тодотгон мэдээлсэн билээ.

Төв банкнаас өнгөрсөн хугацаанд гаргасан Мөнгөний бодлогын шийдвэрүүдийг сануулахад:

Мөнгөний бодлогын хорооны 2021 оны 12 дугаар сарын хурлаас төв банкнаас банкуудад олгодог урт хугацаат репо санхүүжилтийн хүүг ‘бодлогын хүү+0.5 хувь’ байхаар өсгөн тогтоосон. Долларжилтын эрсдэлээс, төгрөгийн харьцангуй өгөөжийг хадгалах зорилгоор гадаад валютын татан төвлөрүүлсэн хөрөнгөнд тооцох заавал байлгах нөөцийн хувийг 3 нэгж хувиар нэмэгдүүлж 18 хувьд хүргэх шийдвэрийг гаргасан.

2022 оны 1 дүгээр сард ээлжит бусаар хуралдаж мөнгөний бодлогын төлөвийг бодлогын хүү болон төгрөгийн заавал байлгах нөөцийн хувиар дамжуулан үргэлжлүүлэн чангаруулсан. Бодлогын хүүг 0.5 нэгж хувиар нэмэгдүүлж 6.5 хувьд хүргэх, төгрөгийн татан төвлөрүүлсэн хөрөнгөнд тооцох заавал байлгах нөөцийн хувь хэмжээг 2 нэгж хувиар нэмэгдүүлж 8 хувьд хүргэх арга хэмжээг авсан.

2022 оны 3 болон 6 дугаар сарын Мөнгөний бодлогын хорооны ээлжит хурлаар инфляцын хүлээлт өсөх, төлбөрийн тэнцэлийн алдагдал нэмэгдэхийн зэрэгцээ гадаад суурь хүү илүү хурдтай өсөх нөхцөлийг харгалзан бодлогын хүүг харгалзан 2.5 болон 1 нэгж хувиар нэмэгдүүлж 10 хувьд хүргэх шийдвэрийг гаргасан юм. 

Төв банкны зүгээс хатуу бодлогын нөлөөлөл  энэ намраас хүчтэй гарч эхэлнэ гэж тооцож буйгаа мэдэгдэж байсан.  Түүнчлэн  энэ удаагийн хурлаараа бодлогын хүүг нэмж өсгөхгүйгээр харзнах магадлалтай юм.