Цараатай улстөрч Б.Дэлгэрсайхан
Говио хөгжүүлж байж эдийн засаг өснө
УИХ-ын 2024 оны сонгуульд говийн бүсийн долоодугаар тойрогт нэр дэвшиж буй “Манай говийн долоо”-гийн нэг нь УИХ-ын гишүүн Б.Дэлгэрсайхан юм. Б.Дэлгэрсайхан гишүүн 2016, 2020 онд Дорноговь аймгаас нэр дэвшин ялалт байгуулж УИХ-д сонгогдсон, 2024 оны сонгуульд говийн бүсийн долоодугаар тойрогт нэр дэвшээд явж байна. Түүнийг улс төрийн хүрээнийхэн, сонгогч, дэмжигчид нь “Цараатай улстөрч” хэмээдэг. Тэрбээр цөөн атлаа жинтэй дуугардаг гишүүн. Бизнесийн салбарын төлөөллийн хувьд эдийн засгийн асуудлаар голчилж ярина. Чуулганы танхимд түүний амнаас “Говио хөгжүүлж байж улсын эдийн засаг өснө” гэсэн үг байн байн гардаг юм. “Том төслүүдээ хөдөлгөж байж эдийн засаг тэлнэ”, “Монгол Улс бүс нутагтаа эдийн засгийн өсөлттэй орнуудын тоонд ордог. Үүнийг цааш хэрхэн авч явах нь говийн бүсээс ихээхэн хамаарна” гэж чуулганы танхимд говь нутгийнхаа үнэ цэн, үнэлэмжийг өргөдөг эрхэм. Парламентад нэн хэрэгтэй байгаа хуульч гишүүдийн нэг.
Тэрбээр УИХ-ын гишүүнээс гадна УУХҮЯ-ны дэргэдэх Аж үйлдвэржилтийн Үндэсний хорооны Хар төмөрлөгийн дэд хорооны дарга, Хот, хөдөөгийн сэргэлтийн ажлын хэсгийн дарга, Хөшигийн хөндийн бүтээн байгуулалтын Үндэсний хорооны дарга, Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны даргын ажилтай. Бүгдээрээ цараатай улстөрчийн л хийх ажлууд.
Иргэддээ хүртээмжтэй ажлууд
УИХ-ын гишүүн Б.Дэлгэрсайханы хийсэн бүтээсэн ажлууд иргэддээ ихэд хүртээмжтэй. Иргэдэд хүү багатай зээлийг хүртээмжтэй олгох, орон сууцыг бүх төрлийн үйлчилгээний газартай нь хамт цогц хороолол маягаар байгуулах талаар яриа хөөрөө хийхээс гадна хувийн хөрөнгөөрөө Дорноговь аймагтаа “Мандах наран” 3000 айлын цогцолбор хорооллыг яг энэ жишгээр барьжээ. Бүр Дорноговь аймгийн МАН-ын мөрийн хөтөлбөрт энэ талаар тусгуулж одоо ч бүтээн байгуулалт үргэлжилж байна. Тойргийнхоо олон ч хүүхдийг гадаад, дотоодод их, дээд сургуульд сурахад нь хувиасаа тэтгэлэг олгосонд иргэд, сонгогчид нь талархалтай байдаг. Нутаг орноо хөгжүүлэх, говь нутгийн иргэдийг ажлын байраар хангах чиглэлд багагүй ажил хийж ирэв. Тавантолгой-Зүүнбаян чиглэлийн 414.6 км төмөр зам, төр, хувийн хэвшлийн түншлэлээр хийх Зүүнбаян-Ханги чиглэлийн 226.9 км төмөр замын ажил, Замын-Үүд боомтын өргөтгөл шинэчлэл, хувийн хэвшлийн хөрөнгөөр Ханги боомтод олон төрөлт тээврийн терминал байгуулах зэрэг бүс нутгийн төдийгүй улсын чанартай бүтээн байгуулалт, Сайншанд хотод 700 суудалтай “Саранхөхөө” театр, 3D кинотеатр, хүүхдийн “Жаргалан” зуслан, ахмадын сувилал, 1000 хүний суудалтай спорт цогцолбор, хэд хэдэн суманд сургууль, цэцэрлэг гээд олон ажлыг санаачлан бодитоор хэрэгжүүлээд байна. Монгол Улсын Үндсэн хуульд нэмэлт, өөрчлөлт оруулах, Зөрчлийн тухай хууль, Хилийн тухай хуулийн шинэчилсэн найруулга, Эрүүгийн хуульд нэмэлт, өөрчлөлт оруулах тухай, Цэргийн албан хаагчийн тухай зэрэг олон хуулийг санаачлах, боловсруулах, батлахад оролцсоныг бас хэлэх нь чухал.
“Түгжрэлийн сайд”
Б.Дэлгэрсайхан гишүүн Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны даргаар ажиллаж байна. Энэ ажлыг нийслэлчүүд “Түгжрэлийн сайд” хэмээн нэрлэдэг юм. Авто зам дээрээ тэг зогсож, таг гацдаг зовлонг улаанбаатарчууд чамгүй олон жил эдлэж буй. Хэдийгээр Б.Дэлгэрсайхан гишүүн сайдын ажлыг аваад удаагүй боловч энэ байдлаас нийслэлийн иргэдийг гаргахын тулд ганцхан сарын хугацаанд их багтаамжийн дизель хөдөлгүүртэй 600, цахилгаан 55, дунд оврын 50 автобусаар нийтийн тээврийн парк шинэчлэлтийг сэлбэж дуусгав. Автобусны жолооч нарын цалинг 3.0-3.5 сая төгрөг болгов. Метро байгуулах ажлыг эхлүүлэх Засгийн газрын тогтоолыг батлуулав. Түгжрэл ихтэй хэсгүүдэд “Кабель кар”-ын бүтээн байгуулалтыг эхлүүлж байна. Хөшигийн хөндийн олон улсын нисэх онгоцны “Чингис хаан” буудлыг түшиглэсэн Шинэ Зуунмод хот байгуулах Засгийн газрын тогтоолыг батлууллаа. Засгийн газраас дэвшүүлсэн “20 минутын хот” бодлогыг хэрэгжүүлэх үүднээс Богд уулын амуудыг холбосон туннель байгуулж, төрийн байгууллагуудыг нийслэлийн төвөөс гаргах ажлыг дэмжээд явж байна. УИХ-ын 2024 оны сонгуульд барих МАН-ын мөрийн хөтөлбөрт тусгасан Зүүнбаян-Сайншанд-Баруун-Урт-Хөвт чиглэлийн 249 км төмөр зам болон бусад чиглэлийн төмөр замын барилгын ажлыг хэрэгжүүлэх болон говь нутгийг усжуулах, хилийн боомтуудыг хөгжүүлэхэд Б.Дэлгэрсайхан гишүүн цараатай улстөрчийн зангаргаа цаашид ч дайчлан ажиллах нь гарцаагүй.
