АНУ-д зэс нийлүүлэхэд импортын гаалийн татвар нэвтрүүлэх шаардлагатай эсэхийг судлах үүрэг өгчээ

АНУ-ын ерөнхийлөгч Доналд Трамп тус улсад зэс нийлүүлэхэд импортын гаалийн татвар нэвтрүүлэх шаардлагатай эсэхийг судлахыг Худалдааны сайд Говард Латникт үүрэг болгосон зарлигт гарын үсэг зурсан байна.

Америкийн худалдааны сайд тус улсын Батлан хамгаалах, Дотоод хэрэг, Эрчим хүчний сайд нартай уялдаа холбоотойгоор АНУ-д бусад улсаас зэс нийлүүлж байгаа нь үндэсний аюулгүй байдалд хэрхэн нөлөөлж байгааг шалгах бөгөөд уг шалгалтаас гарах дүгнэлтийн үндсэн дээр импортын гаалийн татвар нэвтрүүлэх асуудлыг шийдвэрлэх юм байна.

Худалдааны сайд энэхүү зарлигт гарын үсэг зурснаас хойш 270 хоногийн дотор шалгалтын үр дүнгийн тайланг Америкийн засаг захиргаанд гаргаж өгөх ёстой аж. Уг тайланд зохих дүгнэлтүүд болон гаалийн татвар нэвтрүүлэх, экспортын хяналт тогтоох, АНУ-ын нутаг дэвсгэр дээр үйлдвэрлэх зэсийн хэмжээг нэмэгдүүлэх замаар нүүрлэж болзошгүй аюулаас сэрэмжлэх зөвлөмжийг тусгах юм байна.