Украин улс ашигт малтмал ашиглах тухай АНУ-тай байгуулах хэлэлцээрийг хүлээн зөвшөөрчээ

Украин улс ашигт малтмал ашиглах тухай хэлэлцээрийн талаар АНУ-ын засаг захиргаатай зөвшилцөлд хүрсэн байна.

Уг хэлэлцээрийн дагуу Украин улс Америкийн бүрэн хяналтад байх хөрөнгө оруулалтын санд 500 тэрбум орчим ам.доллар оруулах ёстой ажээ. Украины эрх баригчдын дэвшүүлж байсан аюулгүй байдлын баталгааны талаар энэхүү хэлэлцээрт тусгаагүй аж.

Гэхдээ Украины түшмэдийн мэдээлснээр, тус улс хэлэлцээрт ихээхэн ашигтай нөхцөлүүдийг оруулж чадсан байна. Хэлэлцээрийн дагуу Украин улс ашигт малтмал, газрын тос, байгалийн хийнээс олох орлогынхоо 50%-ийг АНУ-ын мэдэлд байх уг хөрөнгө оруулалтын санд оруулж байх юм.

Уг сангаас Украины төслүүдийг санхүүжүүлэх бөгөөд мөргөлдөөнийг зохицуулсны дараа АНУ Украины эдийн засгийн хөгжилд тус дөхөм үзүүлэх ажээ. Энэ баримт бичгийг Украины Хууль зүйн яам, Эдийн засгийн яам, Гадаад харилцааны яам дэмжсэн байна.