АМГ-ын дарга асан Д.Батхуяг Мааньтын хориход хүмүүжиж байна

Ашигт малтмалын газрын дарга асан Д.Батхуяг нарын дөрвөн хүнд холбогдох хэргийг өнгөрөгч дөрөвдүгээр сард  Нийслэлийн давж заалдах шатны шүүх авч хэлэлцээд, ялыг нь хөнгөрүүлсэн юм. Д.Батхуягийн ялыг 4 жил, бусад гурван хүний ялыг 3 жил болгосон талаар мэдээлж байсан. Тэгвэл өнгөрсөн долоо хоногт АМГ-ын дарга асан Д.Батхуяг нарын дэглэмийг өөрчилж чанга дэглэмтэй хорих анги руу шилжүүлсэн гэх мэдээлэл бас байна.

АМГ-ын дарга асан Д.Батхуяг болоод  “Зэлэм” компанийн захирал С.Жаргалсайхан нарыгжирийн дэглэмтэй хорих 421-р ангиас чанга дэглэмтэй Мааньтын хорих руу шилжүүлжээ.

Эргэн сануулахад,  анхан шатны шүүх бүрэлдхүүн эдгээр нэр бүхий дөрвөн хүнд холбогдох хэргийг  гурван өдөр хэлэлцсэний эцэст Д.Батхуягт 6 жилийн ял оноосон бол бусад гурван эрхэмд мөн 5-6 жилийн ял оноож, хууль бусаар олгосон 106 лицензийн зөвшөөрлийг хүчингүй болгож, төр мэдэлдээ эргүүлэн авах шийдвэр гаргасан юм.

 Д.Батхуяг эрхмийн тухайд “Саусгоби Сэндс” компанийн хайгуулын болон  ашиглалтын таван лицензийн дөрвийнх нь эрхийг хууль бусаар сэргээсэн нь тогтоогдсон байдаг. Мөн АМГ-ын Геологи, Уул, уурхайн кадастрын дарга Т.Даваацогтоор шийдвэр гаргуулан, н.Жаргалсайханы Зэлэм компанид хууль зөрчин шилжүүлсэн зэрэг гэм буруу нь тус тус тогтоогдсон байдаг.

 Харин Д.Батхуяг нар анхан шатны шүүхийн шийдвэрийг хүлээн зөвшөөрөхгүй давж заалдсанаар ялын хэмжээгээ бууруулж чадсан юм.