Ш.Сайхансамбуу хэдэн тэрбумын шархаа наймаачдаараа ”нөхүүлж” байна

Өнгөрсөн сард “Нарантуул” худалдааны төв шатаж нэг хүний амь эрсдэн, 300 гаруй түрээслэгчид хохирсон. Галын шалтгаан одоогоор тогтоогдоогүй байгаа юм.  Мөн захыг засах ажил ч эхлээгүй хугацаа алдсаар байгаа. Гол шалтгаан нь дээрх хүнсний зах нь худалдаа үйлчилгээ эрхлэхэд зохих ёстой шаардлагыг хангаагүй байсан учир цаашид ажиллах  зөвшөөрлийг өгөөгүйгээс гадна байрладаг газар нь зөвшөөрлийн бус болохоор засварыг хойшлуулжээ.

Хүнсний зах дотор үйл ажиллагаа явуулахаар 300 гаруй түрээслэгч гэрээ хийсэн байдаг бөгөөд тэд түрээсийн талбайгаа хоёроос гурван хүнд түрээслүүлэн ашиг олдог байснаас хохирогчийн тоо 2000 хүрээд байгаа юм. Харин одоогоос 6 жилийн өмнө Алтжин компанийн Сапу худалдааны төвд гал гарч  700 түрээслэгч амжиргааны эх үүсвэрээсээ салж байсан гашуун түүх бий. Тухайн үед хохирлын хэмжээ дөрвөн тэрбумаар  гарч байж. Ингээд бодохоор шатсан хүнсний захын хохирол үстэй толгой арзаймаар их тоо гарах нь ойлгомжтой болов.

Иймд олон нийтийн дунд энэ их мөнгийг төрөөс төлөхөөр болчихгүй байгаадаа гэх айдас төрж байсан ч тэгсхийгээд намдсан. Харин шуугиан тарьсан асуултын хариу буюу дээрх хохирлыг барагдуулах хүмүүсийн нэр бараг л тодорсон байна.

Ингэхдээ тус худалдааны төвийн удирдлагууд хохирлоо нөхөхөөр түрээсийнхээ үнийг нэмээд амжсан. Тодруулбал сарын түрээсээ 26 мянган төгрөгөөр нэмсэн бөгөөд наймаачдад тодорхой шалтгаан хэлэлгүйгээр ердөө л түрээс нэмэгдсэн гэх үг хэлээд 9 дүгээр сарын түрээсийг 26 мянган төгрөгийн нэмэгдэлтэйгээр хураажээ. Хүнсний захынхныг эс тооцоод 18 мянга  орчим түрээслэгчдээс их багаар нэмэгдсэн талбайн түрээсний мөнгө сардаа 468 сая төгрөгийн ологыг Ш.Сайхансамбууд оруулах аж.

Хүнсний захыг шатсанаас 7 хонгийн дараа тэрбээр Улс төрийн тойм сонинд “Хэдэн амбаар шатаа л биз, босгоод л авна” гэх утгатай том юм ярьж байсан бөгөөд түүний өнөө амархан арга нь шулж сурсан наймаачдынхаа “шүүсийг дахин  шахах” л санаа байж.