Нөөцийн махны бизнесийг атгасан “Мах Импекс” хөгц, ялаатай хиамаар хэрэглэгчдийн эрх ашгийг уландаа гишгэж байна

Хүнсний манлай үйлдвэр “Мах импекс” компанийн үйлдвэрлэсэн хиам мууджээ. Нэгэн хэрэглэгч тус компанийн үйлдвэрлэсэн муудсан хиамны зургийг фэйсбүүк хуудаснаа нийтэлсэн байна. 10 дугаар сарын 15-нд худалдан авсан “Мах импекс”- ийн хиам дотроо ногоороод муудсан байна. Ганц итгэж найдаж авч хэрэглэдэг үйлдвэр ингэхээр бусад нь яах вэ? гэж уг зурагтаа тайлбар бичжээ.

Тус зураг дээр хиам ногоорсон бөгөөд голдоо хөгцөрч муудсан байдалтай харагдаж байна. Энэ бол өнөө Хүнсний манлай хэмээн өөрсдийгөө тодотгосон “Мах импекс” компанийн гаргаж байгаа анхны алдаа биш. Тодруулбал  тус үйлдвэрийн нэрийн зайдаснаас  гэр хорооллын модон жорлон дамжаад нисч явдаг ялаа хүртэл гарч ирсэн байдаг. Та доорх зурагнаас хөгцөрсөн давхар утлагат хиамыг ч бас харж байгаа бизээ. Энэ мэтээр удаа дараа хэрэглэгчидээ хохироож эрүүл мэндэд нь заналхийлж байгаа байгууллагад Улсын мэргэжлийн хяналтынхан яагаад юу ч хэлэхгүй байгаа нь тун ч сонирхолтой.

Мах махан бүтээгдэхүүний хувьд хадгалалтын горим алдагдсан гэж тооцоод хэрэглэгчид дамжуулагч дэлгүүр лангууг муудсан асуудалд буруутгаж болох ч зайдсанд нь ялаа чанагдсаныг өмөөрөх ямар ч үндэслэл байхгүй.  Тэд үйлдвэрлэлийн ариун цэврийг сахиагүй нь илтэд харагдана.

Хэдийгээр хувийн байгууллага ашиг харах нь зүй ёсны хэрэг ч гэлээ хүнсний үйлдвэрлэл эрхэлж байгаа бол бүтээгдэхүүний аюулгүй байдлыг, хэрэглэгчийн эрүүл мэндийг хамгийн түрүүнд тавих үүрэгтэй. Гэтэл тэдэнд зөвхөн МӨНГӨ л чухал аж.

“Мах импекс” компанийн хувьд нөөцийн мах бэлтгэх тендерийг авсан байдаг бөгөөд  2000 тонн мах нийлүүлэх эрх авч бусдыгаа тэргүүлж байгаа. 

 Үүний араас “Мах маркет” ХХК 1700 тонн, “Мах экспорт” ХХК 1300 тонн, “Баатрууд тэнгэр” ХХК 1200 тонн, “Тайж трейд” ХХК 1200 тонныг тус тус нийлүүлэхээр болжээ. Ерөн­хийдөө нөөцийн махны бизнесийг энэ таван компани л атгаж байна.

Хамгийн гол нь эдгээр монополь эрхтэй нөөцийн мах нийлүүлэгчдийн ард улс­төрчдийн ашиг сонирхол бий гэлцдэг. Томчуудын дэмж­лэгтэйгээр жил бүрийн сонгон шалгаруулалтад тэн­цэж, Засгийн газраас орж ирэх сул мөнгийг ямар ч асуудалгүй эвтэйхэн ху­ваагаад авчихдаг гэсэн үг.

Тухайлбал, энэ жил хам­­гийн их мах бэлт­гэх эрх авсан “Мах им­пекс” ХХК ЗТБХБ-ын сайд асан, УИХ гишүүн Х.Бат­тулгынх бол өнгөрсөн жил хам­гийн их буюу 2400 тонн мах нийлүүлэх эрх авч байсан “Мах маркет” ХХК нь “Жаст” группийнх.  Ийм байдлаар их хэмжээний мөнгө тоншдог Мах импекс мэтийн компанид мань мэтийн хиам, зайдасхан  худалдан авдаг хэрэглэгчид нэг их ашиг өгч чаддаггүй гэж бодоод үйлдвэрлэлдээ анхаарлаа хандуулж чанаржуулахгүй байна уу гэдэг хардалт бас байх.

Засгийн газрыг атгаж чадсан компанид Мэргэжлийн хяналт ч бүр жижиг санагдаад хөгц ялаатай бүтээгдэхүүн үйлдвэрлэхээсээ айхгүй байж болох. Ямартай ч Мах Импекс ямар нэг аргаар хяналт шалгалтыг давсан болоод л хэн ч юу ч дуугарахгүй байгаа нь лавтай. Харин тэр арга нь яг юу бол?