“Чоно” группын эзэн Т.Энхболдсодонг суллаагүй гэв

 “Чоно” группын эзэн Т.Энхболдсодон суллагдаж, БНСУ-ыг зорьжээ гэх мэдээлэл гараад байсан. Тэгвэл албаны эх сурвалж үүнийг үгүйсгэсэн мэдээллийг өгч байна. Авлигатай тэмцэх газраас түүнийг баривчлан,  Төв аймгийн Цагдан хорих ангид саатуулан шалгах ажиллагаа үргэлжилж байгаа гэлээ.

Т.Энхболдсодон нь Монголын тэргүүн баячуудын жагсаалтын 13 дугаарт 536 сая ам долларын хөрөнгөөрөө жагссан юм. Түүнийг бусдад их хэмжээний авлига өгсөн, мөнгө угаасан  гэх үндэслэлээр сэжиглэн,  хорьж шалгаж байгаа нь бизнесийн талбарын ноёнтнуудыг хууль хяналтын  байгууллагаас шалгаж байгаа явдлыг нэгээр нэмэгдүүлсний сацуу түүний бизнесийн эрх ашгийн асуудал хууль зөрчсөн, мөн улстөртэй ямар нэг хэмжээгээр холбогджээ гэх хандлагыг лавшруулахад хүргээд байгаа. Түүнчлэн бизнес нь өнгөрсөн хугацаанд ихэд цэцэглэн хөгжсөний цаана МАН-ын “Хотын бүлэглэл”-ийн дэм ихээр байсан гэх мэдээлэл байдаг. Харин өдгөө  Т.Энхболдсодонг хорьж шалгах болсон үндэслэлүүдийн нэг нь Н.Энхбаяртай хамтран босгосон  “Blue sky” цамхагтай ч холбоотой гэгдэж буй юм.