Ким Жон Ун гашуудаж байна

Хойд Солонгосын төв телевизээр Ким Жон Ун өнгөрсөн 10-р сард амиа алдсан далайчдад, эмгэнэл илэрхийлж, гашуудаж буй талаар мэдээлсэн юм. Тэрээр далайчдын хойчийн буяны төлөө 1 минут дуугүй байсан гэнэ. Тэрээр мөн залуу далайчид амиа алдсан явдалд харамсаж, унтаж чадаагүй тухайгаа ярьжээ.  Хойд Солонгосын армийн ажиллагааг гүйцэтгэж явсан далайчдаас суралцах их зүйл бий гэсэн юм. Эдгээр далайчид даалгавраа биелүүлэх гэж яваад амиа алдсан гэж байгаа ч яг юу болсон, хэдэн хүн байсан гэдгийг нууцалдаг аж. Тэдний дурсгалын бунхнаас харахад өнгөрсөн сарын 13-нд амиа алдсан бөгөөд хэвлэлүүд далайчдыг өрөмдлөгө хийж байгаад амиа алдсан гэж таамаглажээ. Харин Японы “NHK” суваг 30 орчим албан хаагч амиа алдсан гэж мэдэгдсэн байна. Зоригт дайчдыг оршуулах ёслолд Ким удирдагч өөрийн биеэр оролцжээ.